ДАР ИМА ҶИНОЯТИ ВАЗНИН ФОШ КАРДА ШУД

                Элдорадо, 29 август. (АМИТ «Ховар» — ЛТВ.ру). — Ин ҷиноят, ки 18 сол пеш содир шуда буд, тамоми Амрикоро ба ларза оварда буд. Шахсони номаълум духтарчаи 11 — соларо дар рӯзи равшан зимни ба мактаб рафтанаш дар пеши чашми падару модараш дуздида буданд. Аз ҳамон лаҳза сар карда то имрӯз тақдири духтар маълум набуд. Тавре ки баъдан маълум шуд, духтарча тамоми солҳои гузаштаро дар асорат гузаронидааст.                 Чанд рӯз пеш Ҷейси Ли Дагард ном зан ба шӯъбаи политсияи шаҳри Элдорадои иёлати Калифорния муроҷиат кард. Ин зан ҳамон духтаре буд, ки 18 сол пеш ӯро дуздида буданд.                 Дар ҷараёни тафтиш муқаррар карда шуд, ки Ҷейси тӯли ин солҳо дар шаҳри Антиокаи музофоти Сан — Франсиско, тақрибан 300 километр дуртар аз хонаи падару модараш зиндагӣ кардааст. Духтарчаро Филип Гарридо ном шахс бо кӯмаки ҳамсараш дуздидааст.                  Ҷейси ҳоло 28 сола мебошад. Вай нақл кард, ки имрӯз соҳиби ду духтар аст. Корманди политсия ба хабарнигорон гуфт, ки духтарчаи рабудашуда қисми зиёди умри худро дар хаймаҳо, саройҳо ва иморатҳои хоҷагӣ гузаронидааст. Ҷейси ва духтарчаҳои ӯ умуман ба мактаб нарафтаанд ва духтур ягон маротиба онҳоро муоина накардааст. Бо вуҷуди ин вазъи саломатии модару духтарчаҳои ӯ хуб мебошад.                    Рабояндагони Ҷейси — зану шавҳар Филип ва Ненси Гарридо дастгир карда шуданд. Онҳо ба дуздидани одамон ва таҷовуз ба номус гунаҳкор карда шуданд. Вале онҳо метавонанд, то оғози мурофиаи суд ба ивази як миллион доллари ИМА гарав ба озодӣ бароянд.                                                                                                  Тарҷумон — Қудратов А.