ЭНЕРГЕТИКАИ ТОҶИКИСТОН БОЯД ЧӢ ГУНА ИДОРА КАРДА ШАВАД?

                   Душанбе, 28август. (АМИТ «Ховар», Фарангис Раҳимова). — Имрӯз дар Душанбе оид ба муҳокимаи натиҷаҳои тадқиқи идоракунии бахши энергетикии Тоҷикистон вохўрии кории байналмилалӣ баргузор мегардад.                    Тавре ба АМИТ «Ховар» аз Институти «Ҷамъияти Кушода» — Бунёди Мадад дар Тоҷикистон хабар доданд, тадқиқот аз тарафи Ассотсиатсияи энергетикҳои Тоҷикистон, Иттифоқи истеъмолкунандагони Тоҷикистон, коршиносони соҳаи энергетика, қонунгузорӣ ва масъалаҳои иҷтимоӣ гузаронда шудааст. Дар вохўрии корӣ намояндагони мақомоти давлатӣ, ширкатҳои энергетикӣ ва сохторҳои тиҷоратӣ, ташкилотҳои байналмилалӣ ва ғайриҳукуматӣ, намояндагони ширкатҳои энергетикии хориҷӣ иштирок мекунанд.                    Дар чаҳорчўбаи вохўрӣ ҳисоботи гурўҳи тадқиқотӣ оид ба Тоҷикистон, ки идоракунии бахши энергетикиро дар мамлакат, инчунин дараҷаи иштироки аҳли ҷомеа, ҷанбаҳои ҳуқуқӣ ва қонунии раванди сиёсиро дар идоракунии энергетикаи барқӣ, арзёбии идоракунии бахши энергетикаи барқӣ, ҷанбаҳои иҷтимоиро дар бахши энергетикаи барқӣ инъикос менамояд, пешниҳод карда мешавад.                    Институти Умумиҷаҳонии Захираҳо (Вашингтон, ИМА), Институти Миллии «Молия ва сиёсати ҷамъиятӣ» (Ню-Деҳли, Ҳиндустон) ва Прайяс Энерджи Групп (Пуна, Ҳиндустон) барои арзёбии самаранокии идоракунии бахши таъмини барқ таҳти унвони «Electricity Governance Indicator Toolkit" (EGI) маҷмўи индикаторҳоро таҳия намудаанд.      Маҷмўи индикаторҳои EGI аз гурўҳи масъалаҳое иборат аст, ки ба принсипҳои зерини идоракунии самарабахш мансуб мебошанд: шаффофият, иштирок, ҳисоботдиҳӣ ва иқтидор барои қабул намудани қарорҳо. Онҳоро дар ҳамаи мамлакатҳо сарфи назар аз вазъи сиёсию иқтисодиашон дар амал татбиқ кардан мумкин аст.