ЛАГЕРИ МАЪРИФАТИЮ ИСТИРОҲАТӢ БАРОИ ҶАВОНОН

                     Душанбе, 13 август. (АМИТ «Ховар», Ибодат Давлатова). — Барои 66 нафар гирандагони стипендияи Президентӣ, иштирокчиёни ҳафтаи худидоракунӣ, ҷавонони аз оилаҳои камбизоат дар истироҳатгоҳи «Сомониён»-и ноҳияи Ҷаббор Расулов лагери маърифатию истироҳатӣ гузаронида шуд, иттилоъ доданд аз маркази матбуоти Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон.                    Дар лагер байни ҷавонон бозиҳои зеҳнӣ, шавқовар, байтбарак, истеъдодҳои ҷавон, мусобиқаҳои варзишӣ, дарсҳои одобнома гузаронида шуд.                    Дар маросими ҷамъбасти лагер раиси Кумитаи ҷавонон Маликшо Неъматов иштирок намуда, дар бораи ғамхориҳои давлату ҳукумат нисбат ба ҷавонон ва дастовардҳои ҷавонону варзишгарон суханронӣ намуд.                   Инчунин, дар охир барномаи фарҳангию фароғатӣ пешкаши иштирокчиён гардид. Ҷавонон бо хондани суруди «Ватан» маҳфилро оғоз намуда бо ривояту андарзҳои Имоми Аъзам онро хотима бахшиданд.