МАҶЛИСИ КУМИТАИ ТАДОРУКОТ

                  Душанбе, 12 август. (АМИТ «Ховар», Дилшодаи Ҷонмард).- Имрӯз таҳти раёсати Сарвазири мамлакат Оқил Оқилов маҷлиси нахустини Кумитаи тадорукоти мулоқоти байналмиллалӣ бахшида ба проблемаҳои «Об» дар соли 2010 баргузор гардид.                  Мулоқоти мазкур соли оянда дар Тоҷикистон бо мақсади таҳлил ва натиҷагирӣ аз панҷсоли аввали Даҳсолаи байналмиллалии амалиёти «Об барои ҳаёт», ки бо ташаббуси Президенти Ҷумҳурии Тоҷикистон Эмомалӣ Раҳмон аз ҷониби Созмони Миллали Муттаҳид ва ҷонибдории зиёда аз 140 давлати дунё эълон гардидааст, баргузор мегардад.                  Дар маҷлис аъзои гуруҳи корӣ барои баргузор намудани мулоқот дар сатҳи баланди ташкилӣ, муайян намудани таърихи баргузорӣ ва муҳлати он, таҳияи нақшаи мукаммали корӣ ва таъсис додани суратҳисоби мулоқот пешниҳодҳои муфид баён карданд.                   Бо назардошти муҳокимаву мубоҳисаҳои суратгирифта пешниҳод гардид, ки ҳайати гурӯҳи корӣ ва нақшаи чорабиниҳои аввалиндараҷа оид ба ташкил ва гузаронидани мулоқот байналмилалии об бо назардошти таклифу иловаҳо тасдиқ карда, барои дар сатҳи баланди сиёсию ташкилӣ баргузор гардидани он аз тамоми имконияту захираҳо самаранок истифода бурда шавад.                  Таъкид кардан бамаврид аст, ки баргузории мулоқот байналмилалии «Об» дар соли 2010 идомаи тадбиру чорабиниҳои бузурги минтақавию ҷаҳонии дар Тоҷикистон баргузоршуда- анҷумани байналмилалии «Оби тоза» дар соли 2003, Конфронси байналмилалии ҳамкориҳои минтақавӣ дар ҳавзаи дарёҳои сарҳадгузар дар соли 2005 ва Конфронси байналмилалии коҳиши офатҳои табиии марбут ба об дар соли 2008 ба ҳисоб рафта аз болоравии нуфузу эътибори Тоҷикистон дар арсаи сиёсати байналмиллалии соҳаи об шаҳодат медиҳад