МАШҚИ ҲАРБИИ МИНТАҚАВӢ ДАР ДУШАНБЕ

                Душанбе, 6 август. (АМИТ «Ховар», Наталя Михайлова ). — Дар Душанбе бори аввал машқи ҳарбии давлатҳои Осиёи Ҷанубӣ ва Марказӣ таҳти унвони «Ҳамкории минтақавӣ — 2009» гузаронида мешавад. Ҳадафи он беҳтар сохтани ҳамкории ҷузъу томҳои низомӣ, равнақу ривоҷи муносибатҳо, омӯхтани таҷрибаи ҳамдигар, дастгирии ҳамдигар дар шароити ғайримуқаррарӣ, беҳтар сохтани сатҳи омодагии қисмҳои ҳарбии мамлакатҳои минтақа ва вусъат бахшидани равобити ҳамкории ташкилоту идораҳои дахлдор мебошад. Машқи ҳарбии «Ҳамкории минтақавӣ» аз соли 1997 сар карда, дар мамлакатҳои гуногун баргузор мегардад. Машқ соли 2004 дар Олмон, соли 2005 дар иёлати Вирҷинияи ИМА, соли 2006 дар шаҳри Бишкек, соли 2007 дар шаҳри Остона ва соли 2008 боз дар Бишкек гузаронида шуда буд.                   Аз вазорати мудофиа ба мухбири АМИТ «Ховар» хабар доданд, ки дар ҷараёни машқ андешидани тадбирҳои самарабахш зимни рух додани фалокатҳои табиӣ, аз ҷумла зилзила ва ҳуҷуми дастаҳои мусаллаҳи хориҷӣ ва наҷот додани одамон аз асорат санҷида мешаванд. Дар машқ гурӯҳҳои низомии зудамал, разведка, таъминоти моддию техникӣ ва кӯмаки башардӯстона ширкат меварзанд.                  Мухбири АМИТ «Ховар» хабар медиҳад, ки дар машқи имсолаи «Ҳамкории минтақавӣ -2009» панҷ давлат — ИМА, Қазоқистон, Қирғизистон, Афғонистон ва Тоҷикистон ширкат меварзанд.