МУҲОҶИРАТИ КОРӢ ТАҲТИ НАЗОРАТ ГИРИФТА МЕШАВАД

                      Қазон, 25 август. (АМИТ «Ховар», Наталя Михайлова). — Тавре хабар дода шуда буд, аз 21 то 23 август дар пойтахти Ҷумҳурии Тотористони Федератсияи Русия — шаҳри Қазон маҷлиси муштараки ҳайатҳои мушовараи вазоратҳои корҳои дохилии Ҷумҳурии Тоҷикистон ва Федератсияи Русия баргузор гардид. Дар он вазирони корҳои дохилии ҳар ду мамлакат Абдураҳим Қаҳҳоров ва Рашид Нургалиев иштирок доранд.                     Иштирокчиёни маҷлис дирӯз бо фаъолияти Раёсати бозрасии давлатии автомобили Ҷумҳурии Тотористон шинос гардиданд. Рашид Нургалиев ва Абдураҳим Қаҳҳоров дар маросими ботантанаи ба истифода додани бинои истиқоматӣ ширкат варзида, бо фаъолияти маркази видео ва маркази чавгонбозии раёсати БДА Ҷумҳурии Тотористон шинос гардиданд. Меҳмононро дар ин сафарҳо раиси Шӯрои давлатии Ҷумҳурии Тотористон Фарид Муҳаммадшин ва вазири корҳои дохилии Тотористон Асқад Сафаров ҳамроҳӣ карданд.                      Хабар дода мешавад, ки вазири корҳои дохилии Тоҷикистон А.Қаҳҳоров дирӯз дар Қазон бо коргарони муҳоҷири тоҷик, роҳбарони ҷамъиятҳои тоҷикон ва мардикорони тоҷик мулоқот кард. Вазир ба саволҳои сершумори онҳо ҷавоб дода, зикр намуд, ки муҳоҷирати коргарон имрӯз яке аз проблемаҳои муҳимтарин буда, ҳалли он таҳти назорати ҳамешагии Президенти мамлакат Эмомалӣ Раҳмон қарор дорад.