МУҲОКИМАИ ПРОБЛЕМАИ ҲИФЗИ ЁДГОРИҲОИ ТАЪРИХӢ

                   Душанбе, 12 август. (АМИТ «Ховар», Таҳмина Ғоибназарова). — Дар маҷлиси 24 — уми Шӯрои ҳамкории фарҳангии давлатҳои ИДМ масъалаи такмил додани қонунҳо дар бобати ҳифзи ёдгориҳои таърихӣ муҳокима шуд. Коршиноси Вазорати фарҳанги Русия Тамара Гудима аз номи гурӯҳи корӣ маърӯза кард. Гурӯҳи кории мазкур лоиҳаи қонунро дар Маскав мавриди баррасӣ қарор дода буд. Иштирокчиёни маҷлис ба лоиҳаи қонун баъзе тағйироту иловаҳо ворид намуданд.                    Иштирокчиёни маҷлис пешниҳод карданд, ки аз вазоратҳои фарҳанги мамлакатҳои ИДМ дар бораи таҷрибаи ҳифзи ёдгориҳои таърихӣ ва мероси фарҳангӣ маълумоти муфассал талаб карда шавад. Дар асоси он қарорҳое қабул кардан мумкин аст, ки ба такмил додани қонунҳои мамлакатҳои ИДМ дар ин масъала мусоидат хоҳанд кард.