ПАЖӮҲИШГАРОНИ ЭРОНӢ БА ТОҶИКИСТОН РАСИДАНД

                    Душанбе, 5 август. (АМИТ «Ховар», Марзия Саидова).-Гурӯҳи пажӯҳишии Анҷумани «Манзар»-и Донишгоҳи Теҳрон баъди шиносоӣ бо тамаддуну фарҳанги кишварҳои Туркманистон ва Ӯзбекистон тавассути нақлиёт озими Тоҷикистон шуданд.                    Гурӯҳи беш аз 30 нафара, ки онро доктори Донишгоҳи Теҳрон Оташинбор сарпарастӣ менамояд аз донишҷӯёну пажӯҳишгарон иборат аст.                    Аз Сафорати Ҷумҳурии Исломии Эрон дар Ҷумҳурии Тоҷикистон ба АМИТ «Ховар» иттилоъ доданд, ки ин гурӯҳ қаблан зимни чор сафари пажӯҳишии худ ба кишварҳои Аврупои ғарбӣ ва шарқӣ аввалин бор аз кишварҳои Осиёи Марказӣ дидан намуда, бо таъриху фарҳанг ва тамаддуни ин давлатҳо ошно мегарданд.                    Алҳол, ин гурӯҳ шаҳрҳои бостонии Кӯлоб ва Қӯрғонтеппаи Тоҷикистонро тамошо карда, бо ёдгориҳои қадимаи ин шаҳрҳо, санъат, урфу одат ва санъати шаҳрсозӣ шинос гардиданд. Пажӯҳишгарон ҳамчунин ба Вилояти Мухтори Кӯҳистони Бадахшон сафар намуда, баъдан ба Қирғизистон мераванд.                  Гурӯҳи пажӯҳишии мазкур зимни бозгашт ба Эрон хотираҳои сафари худро гирдоварӣ намуда, доир ба таъриху тамаддун ва фарҳангу санъати меъморию шаҳрсозии кишварҳои Осиёи Марказӣ китоб нашр менамоянд.