СЕ ХУДКУШӢ ДАР ЯК ШАБОНАРӮЗ

                Душанбе, 26 август. (АМИТ «Ховар», Таҳмина Ғоибназарова). — Дар давоми шабонарӯзи гузашта дар мамлакат се ҳодисаи худкушӣ ба қайд гирифта шуд.                Аз ҷумла, сокини 35 — солаи ҷамоати Чоргултеппаи ноҳияи Рӯдакӣ Ибодулло Бостонов, ки пеш аз ин мувофиқи моддаи 212 Кодекси ҷиноии Ҷумҳурии Тоҷикистон дар бораи риоя накардани қоидаҳои ҳаракати роҳ ва истифодаи дурусти воситаҳои нақлиёт ҳабс шудааст, худро бо роҳи овехтан ба ҳалокат расонд.               Ҳодисаи дуюми худкушӣ дар ноҳияи Ҷалолиддини Румӣ рух дод. Дар ин ҷо сокини ҳамин ноҳия Қаҳрамон Ғуломов хушкушӣ кард.               Ғайр аз ин сокини 21 — солаи ноҳияи Ишкошим, донишҷӯӣ соли 2 — уми Донишгоҳи давлатии шаҳри Хоруғ Роҳат Исматбекова худро ба дарёи Панҷ партофт. Ҷасади духтар то ҳол ёфт нашудааст. Ҷӯстуҷӯи он давом дорад.               Аз рӯи маълумоти расмӣ, дар Тоҷикистон ҳар сол аз 100 ҳазор нафар аҳолии мамлакат панҷ — шаш нафар худкушӣ мекунанд. Вале, ба қавли муҳаққиқони мустақил шумораи онҳое, ки ба худкушӣ даст мезананд, 2 — 3 баробар зиёд мебошад. Аз ҷумла, мутахассиси ҳамин соҳа Даврон Муҳаммадиев ба қарибӣ зимни машварати бахшида ба ҳамин мавзӯъ дар Китобхонаи миллии ба номи Фирдавсӣ баргузоргардида дар ин бора сухан ронда буд. Вай зикр кард, ки соли гузашта дар Тоҷикистон 540 ҳодисаи худкушии одамон ба қайд гирифта шуд.