ҲАМА ЧИЗ БАРОИ ТИРАМОҲУ ЗИМИСТОН ЗАХИРА ШУДААСТ

                  Душанбе, 25 сентябр. (АМИТ «Ховар», Лаззат Диловарзод).- Бино ба иттилои сардори идораи тандурустии шаҳр Абумуслим Темуров, 52 муассисаи тандурустии шаҳри Душанбе барои қабули гармӣ аз маркази гармидиҳии шаҳри Душанбе омодаанд. Тамоми системаи гармидиҳии муассисаҳои тиббии шаҳр хушсифат аз таъмир бароварда шуданд. Дар сурати мушкилоти барқ дар фасли тирамоҳу зимистони соли 2009 – 2010 идораи тандурустии шаҳр 114 генератор, 83 печҳои барқию керосинӣ ва беш аз 500 дона тафсонакҳо, 69 тонна ангишт, 175 куб ҳезум, дар сурати сар задании садамаҳои барқӣ сӯзишвории дизелӣ барои ду –се рӯз захира карда шудааст. Ҳамчунин Ҳукумати шаҳр барои муассисаҳои тандурустӣ 4 генератор ҳар кадом бо иқтидори 20 кВт ҷудо намудааст, ки дар таваллудхонаҳои рақами 2 ва 3, беморхонаи инфексионӣ, ва клиникаи бачагонаи шаҳр чойгир карда мешаванд.                   -Умуман агар бо як мафҳум ифода кардан мумкин бошад, мо ба зимистон тайёрем, — мегӯяд сардори идораи тандурустии шаҳр Абумуслим Темуров.