Ҳ.КАРЗАЙ МУХОЛИФОНАШРО БА МУСОЛИҲА ДАЪВАТ МЕКУНАД

                   Кобул, 22 сентябр. (АМИТ «Ховар» — афғон.ру). – Президенти Афғонистон Ҳамид Карзай дар ҷамъомади бахшида ба иди Рамазон дар Қасри президент – «Арки Кобул» ҳамаи дастаҳои мухолифини мусаллаҳ, аз ҷумла, ҷунбиши «Толибон» — ро даъват намуд, ки тарки аслиҳа намуда, ба хонаҳояшон баргарданд ва зиндагии осоиштаро пеш гиранд. Ҳ.Карзай зикр намуд, ки дар мавриди тасдиқи пирӯзиаш дар интихоботи президент ба гуфтушунид бо «Толибон» шурӯъ хоҳад кард.                    Воситаҳои ахбори оммавии Афғонистон як рӯз пеш аз иди Рамазон номаи роҳбари маънавии ҷунбиши «Толибон» Мулломуҳаммад Умарро чоп карда буданд. Роҳбари «Толибон» даъват мекунад, ки тамоми қисмҳои ҳарбии хориҷӣ аз Афғонистон бароварда шаванд ва онҳое фаромӯш карда нашаванд, ки дар натиҷаи бомбаборонҳои тахминии амрикоиён ҳалок гардидаанд.                    Бояд гуфт, ки изҳороти роҳбари «Толибон» ба вазъияти содир гардидани амалиёти террористӣ ягон таъсир нарасонд. Хабар дода мешавад, ки як рӯз пеш аз иди Рамазон дар вилояти Кандаҳор бар асари таркиши мина ду хизматчии ҳарбӣ ва се сокини маҳалӣ ҳалок гардиданд.                   Қайд кардан лозим аст, ки «Толибон» қабл аз ин ҳам даъватҳои ҳукумати Афғонистонро дар бораи мусолиҳа рад карда буданд. «Толибон» талабҳое пеш гузоштанд, ки онҳоро на ҳукумати Кобул ва на иттифоқчиёни хориҷии он қабул карда наметавонистанд.