ДАР СУҒД БА ШАРАФИ ҒОЛИБОН «ПАРЧАМИ ШАРАФ» БАРАФРОХТА МЕШАВАД

                 Душанбе, 22 сентябр. (АМИТ «Ховар», Бекназари Абӯбакр). — Дар вилояти Суғд мусобиқаи меҳнатӣ байни ноҳияҳо ва хоҷагиҳои пахта кор доир мегардад. Ин нуқта дар қарори раиси вилояти Суғд Қоҳир Расулзода «Оид ба саривақт ва беталаф ҷамъоварӣ намудани ҳосили пахтаи соли 2009» зикр шудааст.                  Мутобиқи қарори мазкур сарраёсати кишоварзии вилоят дар якҷоягӣ бо Кумитаи иттифоқи касабаи комплекси агросаноатии вилоят барои баррасӣ намудани шартҳои мусобиқаи меҳнатӣ байни ноҳияҳо ва хоҷагиҳои пахтакор то 25-сенятбри соли равон, вазифадор шудаанд. Ҷамъбасти давраи аввали мусобиқаи меҳнатӣ санаи 10-октябри соли ҷорӣ муайян гашта, давраҳои минбаъдаи он дар ҳар 20 рӯз натиҷагирӣ ва дар маркази шаҳру навоҳии пахтакор ба шарафи ғолибон «Парчами шараф» барафрохта хоҳад шуд. Дар баробари ин, раиси вилоят бо имзои як фармоиш Маркази вилоятии корҳои фарҳангӣ, тарғиботу ташвиқотӣ ва дафтари матбуоти вилоятии «Ҳосил-2009»-ро таъсис намуда, масъулини онро вазифадор кард, ки барои инъикоси мунтазами маъракаи ҷамъоварии пахта ва ташкили чорабиниҳои фарҳангӣ чораҳои мушаххас андешанд.                 Гуфтанист, ки ситоди вилоятии «Ҳосил-2009» таҳти раёсати раиси вилоят Қоҳир Расулзода таъсис ёфта, ҳамчунин ба раисони шаҳру ноҳияҳои вилоят дастур дода шудааст, ки чунин ситодро ташкил намоянд ва кори пурсамари онро ба роҳ монанд.