КОНФРОНСИ ХУЛОСАВИИ ЛОИҲАИ «ВИЧ-СПИД ВА МУҲОҶИРАТ»

                 Душанбе, 28 сентябр. (АМИТ «Ховар», Ибодат Давлатова). – 29 сентябри соли ҷорӣ дар меҳмонхонаи «Меркурий»-и пойтахт вохӯрӣ-конфронси хулосавӣ аз рӯи натиҷаҳои иҷрои лоиҳаи «ВИЧ-СПИД ва муҳоҷират» баргузор мегардад.                    Тавре аз маркази матбуоти Вазорати тандурустии ҶТ иттилоъ доданд, дар ин чорабинӣ мутахассисони соҳаи тандурустии ҷумҳурӣ, намояндагони вазорату муассисаҳои дахлдор, созмонҳои байналмилалӣ ва иттиҳодияҳои ҷамъиятии маҳаллӣ ширкат хоҳанд варзид.                  Дар назар аст, ки дар вохӯрӣ-конфронс муовини вазири тандурустии Ҷумҳурии Тоҷикистон Аъзамҷон Мирзоев иштирок ва баромад мекунад.                  Бояд қайд кард, ки маблағгузории ин лоиҳа аз тарафи Бонки рушди Осиё амалӣ карда мешавад. Маблағи ин лоиҳа 500 000 доллар буда, мақсади асосии он баланд бардоштани савияи дониши муҳоҷирон аст.                  Дар рафти амалигардонии лоиҳа ба нуқтаҳои тиббии ноҳияҳои Рашт, Тоҷикобод, Нуробод баъзе таҷҳизоти тиббӣ ва техникӣ харидорӣ шудааст, ки пас аз хотимаёбии лоиҳа барои истифодаи бебозгашт дода хоҳанд шуд.