МУСОБИҚАИ БАЙНАЛХАЛҚӢ БАРОИ ПОСИ ХОТИРИ С.РАҲИМОВ

                 Душанбе, 22 сентябр. (АМИТ «Ховар», Пайрав Назаров). – Дар Қасри варзиши «Самандар – 21» — и шаҳри Турсунзода аз 3 то 5 октябр барои поси хотири Қаҳрамони варзиши ҷаҳон Саидмӯъмин Раҳимов мусобиқаи байналхалқии самбо баргузор мегардад.                 Дар мусобиқа варзишгарони зӯртарини мамлакатҳои Осиёи Марказӣ ширкат меварзанд.                 Мухбири АМИТ «Ховар» ёдовар мешавад, ки Саидмӯъмин Раҳимов 12 феврали соли 2009 дар синни 62 — солагӣ вафот кард. Ӯ варзишгари бузурги шӯравӣ ва тоҷик ба шумор меравад.                 С.Раҳимов соли 1975 дар шаҳри Минск дар мусобиқаи байналхалқии самбочиён ширкат варзида, дар вазни 100 кг қаҳрамони варзиши ҷаҳон гардида буд. Ӯ ҳамчунин ду карат қаҳрамони варзиши Иттиҳоди Шӯравӣ мебошад.                 Саидмӯъмин Раҳимов аз соли 1995 то соли 2004 ба Кумитаи варзиш ва тарбияи ҷисмонии назди Ҳукумати Тоҷикистон роҳбарӣ кардааст.