НАМОЗИ ИДОНА ДАР МАСҶИДИ ШАЙХМУСЛИҲИДДИН

                  Хуҷанд, 22 сентябр. (АМИТ «Ховар», Санавбар Мақсудова). — Дирӯз, 21 сентябр ба муносибати анҷом ёфтани моҳи Рамазон дар масҷиди Шайхмуслиҳиддин ва майдони Регистони ноҳияи Панҷшанбе зиёда аз 40 ҳазор нафар барои гузаронидани намоз ҷамъ омад.                   Онҳоро намояндагони маъмурияти шаҳр ва мақомоти иҷроияи ҳокимияти давлатии вилоят табрик намуданд.                    Мухбири АМИТ «Ховар» хабар медиҳад, ки ҳамаи мусулмонони вилоят пешниҳоди Президенти ҷумҳурӣ Эмомалӣ Раҳмонро дар бораи расондани кӯмак ба мӯҳтоҷон ба шарафи иди Рамазон дастгирӣ намуда, тадбирҳои гуногуни хайрия гузаронданд. Аз ҷумла, масҷиди Шайхмуслиҳиддин ба Хонаи маъюбону мӯйсафедони бекасу танҳои «Деҳмой» ба маблағи 3,5 ҳазор сомонӣ маводи озуқа тӯҳфа намуд. Маблағи мазкурро намозгузорони масҷид ва ширкати «Индиго Сомонком» ҷамъ оварданд.                     Раиси Шӯрои уламои вилоят Ҳоҷиҳусейн Мӯсозода изҳор намуд, ки диндорон барои иҷрои дастуру супоришҳои сардори давлат дар бораи сарфакорона истифода бурдани қувваи барқ ва истифодаи чароғҳои барқии каммасраф маблағи ҷамъгардидаи фитри рӯзаро барои харидани лампаҳои барқии сарфакунандаи қувваи барқ истифода мебаранд. Ин лампаҳо баъдан дар байни сокинони эҳтиёҷманд тақсим карда мешавад.