ОҒОЗИ МУЛОҚОТИ ОЛИМОН ВА ЭҶОДКОРОНИ ҶАВОНИ МАМЛАКАТҲОИ ИДМ

                 Кишинёв, 25 сентябр. (АМИТ «Ховар», Ҳалима Хушқадамова). – 24 сентябр дар Қасри Ҷумҳурияти шаҳри Кишинёв мулоқоти навбатии олимон ва эҷодкорони ҷавони мамлакатҳои ИДМ кушода шуд. Дар он 450 нафар олимони машҳур, арбобони илму ҳунар ва созмонҳои ҷавонони 11 мамлакати ИДМ — Тоҷикистон, Белорусия, Қазоқистон, Қирғизистон, Молдавия, Русия, Туркманистон, Ӯзбекистон, Украина, Озарбойҷон ва Арманистон иштирок доранд.                 Иштирокчиёни мулоқотро иҷрокунандаи вазифаи президенти Молдавия, раиси парлумони ин мамлакат Михай Гимпу, роҳбари маъмурияти президенти Русия Сергей Наришкин, раиси Кумитаи иҷроияи ИДМ Сергей Лебедев, муншии умумии Ассамблеяи байнипарлумонии ИДМ Михаил Кротов, раиси Шӯрои ҳамкории гуманитарии давлатҳои ИДМ, намояндаи махсуси президенти Русия дар масъалаи ҳамкории гуманитарӣ бо мамлакатҳои ИДМ Ҷаҳон Полиева, ректори Донишгоҳи давлатии Маскав, академик Виктор Садовничий, роҳбарони ҳайатҳо ва дигарон табрик намуданд.                  Вазири маорифи ҷумҳурии Тоҷикистон, узви раёсати Фонди байналхалқии ҳамкории гуманитарӣ Абдуҷаббор Раҳмонов паёми табрикии Сарвазири Тоҷикистон Оқил Оқиловро ба унвони иштирокчиёни мулоқот қироат намуда, дар бораи таҷрибаи Тоҷикистон дар бобати ҳамкории гуманитарӣ бо мамлакатҳои ИДМ сухан ронд.                 25 сентябр дар ҷараёни мулоқот натиҷаҳои Соли ҷавонони ИДМ ҷамъбаст намуда, барномаҳои ба Соли илм ва навигариҳои техникӣ бахшидашуда мавриди баррасӣ қарор гирифтанд.