МАЪРАКАИ ПЕШГИРИИ БЕМОРИҲОИ ГЕЛМИНТӢ

                 Душанбе, 13 октябр. (АМИТ «Ховар», Ибодат Давлатова ). –Аз тарафи вазири тандурустии Ҷумҳурии Тоҷикистон Нусратулло Салимов ва вазири маорифи Ҷумҳурии Тоҷикистон Абдуҷаббор Раҳмонов оид ба гузаронидани маъракаи гелминтӣ (бекирмгардонӣ) фармони якҷоя ба тасвиб расид. Дар ин бора аз маркази матбуоти Вазорати тандурустии ҶТ хабар доданд.                  Ин чорабинӣ бо мақсади паст намудани сатҳи паҳншавии бемориҳои гелминтӣ ва кам намудани миқдори гелминтҳо дар бадани мактаббачагони синни 7-14 солаи шаҳру ноҳияҳои ҷумҳурӣ аз 28 то 30 октябри соли ҷорӣ гузаронида мешавад. Дар назар аст, ки ин чорабинӣ ҷамъ 1 миллиону 336 ҳазору 139 нафар мактаббачагонро дар тамоми ҷумҳурӣ фаро мегирад.                 Бино ба маълумоти манбаъ, тибқи ин фармон ҳамаи сардорони раёсатҳои тандурустӣ ва маорифи вилоятҳо, шаҳри Душанбе, сартабибони беморхонаҳои марказӣ ва мудирони шӯъбаҳои маорифи шаҳру ноҳияҳои тобеи ҷумҳурӣ вазифадор карда шудаанд, ки барои гузаронидани корҳои ташкилӣ ва назоратӣ оид ба чорабинии бекирмгардонӣ дар байни мактаббачагон, гурӯҳҳои назоратиро созмон диҳанд ва мақомоти иҷроияи маҳаллии ҳокимияти давлатии вилоятҳо, шаҳрҳо ва ноҳияҳоро оид ба гузаронидани ин чорабинӣ воқиф намоянд.                 Ҳамчунин, гузарондани корҳои тайёрӣ дар байни кормандони тиббӣ ва омӯзгорон, созмон додани гурӯҳҳои мониторингӣ, омӯзишӣ, тақсимоти доруҳо ва бурдани корҳои таблиғотию ташвиқотӣ дар байни аҳолӣ бо истифодаи васеи воситаҳои ахбори омма гузаронида мешаванд.                   Чорабинии бекирмгардонӣ бо кӯмак ва дастгирии молиявии Хазинаи кӯдакони Созмони Милали Муттаҳид ЮНИСЕФ гузаронида мешавад.