АЛОМАТҲОИ РОҲРО КӢ МЕДУЗДАД?

                  Кӯлоб, 12 ноябр. (АМИТ “Ховар”, Сулаймон Холов).- Масъулини идораи танзими роҳҳои нақлётӣ дар минтақаи Кӯлоб аз ғорат шудани беш аз ҳазор аломати роҳ изҳори нигаронӣ намуданд. Муродалӣ Хомӯшов, сармуҳандиси идораи роҳҳои нақлиётии минтақаи Кӯлоб мегӯяд, дар ҳоле, ки таи чанд моҳи охир ба ғорат бурдани аломатҳои роҳ идома дорад, шӯъбаи корҳои дохила то ҳанӯз ягон тан аз ғоратгаронро боздошт накардааст. “Онҳо ҳанӯз намедонанд, ки ин аломатҳоро кӣ ва ба кадом хотир ба яғмо мебарад. Ба ақидаи мутахассисон аломатҳои роҳ ҳамчун метали рангаи арзишнок аз ҷониби бархе сокинон ба хотири пайдо кардани маблағ канда фурӯхта мешаванд”,-гуфт М. Хомӯшов.