БАРРАСИИ ВАЗЪИ АФҒОНИСТОН ДАР ТОҶИКИСТОН

                  Душанбе, 18 ноябр. (АМИТ «Ховар», Дилшодаи Ҷонмард).- Маркази тадқиқоти стратегии назди Президенти Ҷумҳурии Тоҷикистон ва Дафтари Созмони амният ва ҳамкорӣ дар Аврупо дар Тоҷикистон тасмим гирифтаанд, ки 24-25 ноябри соли равон дувумин Конфренсияи ҳамасолаи байналмилалии «Осиёи Марказӣ ва Афғонистон; таҳдидҳо, имконот ва дурнамо»,- ро баргузор намоянд.                  Дар назар аст, ки дар кофренсияи мазкур сардори Дафтари САҲА дар Тоҷикистон Сафир Ивар Вики, сафири фавқуллода ва мухтори Ҷумҳурии Исломии Афғонистон дар Тоҷикистон Сайид Муҳаммади Хайрхоҳ, директори Инистути таҳлилҳои стратегӣ ва арзёбии назди Президенти Ҷумҳурии Қирғизистон Масаулов С.И., сафири фавқуллода ва мухтори Ҷумҳурии Исломии Эрон дар Ҷумҳурии Тоҷикистон Алиасғари Шеърдӯст ва сарпарасти бахши тадқиқоти сиёсати хориҷии Институти қазоқистонии тадқиқоти стратегии назди Президенти Ҷумҳурии Қазоқистон Булат Ауелбаев иштирок ва суханронӣ кунанд.                   Мавзӯи асосие, ки дар конфренсияи мазкур мавриди баррасӣ қарор хоҳад гирифт, ин ҳамкориҳои эҳтимолии кишварҳои Осиёи Марказӣ дар самти Афғонистон ва муасиртарин равиши мубориза ба ҷолишҳои мавҷуд дар Осиёи Марказӣ ва Афғонистон, инчунин имконоти Созмони аҳдномаи амнияти дастаҷамъӣ дар рафъи таҳдидҳо ба амнияти кишварҳои аъзо ва масъалаҳои муҳими рӯз ҳоҳанд буд.