ДАР МАСКАВ МАСОИЛИ АФҒОНИСТОНРО БАРРАСӢ КАРДАНД

                  Душанбе, 12 ноябр. (АМИТ «Ховар», Ҳалима Хушқадамова). – Дирӯз дар шаҳри Маскав ҷаласаи 8 –уми Гурӯҳи корӣ оид ба Афғонистон дар назди Шӯрои вазирони корҳои хориҷии Созмони аҳдномаи амнияти дастаҷамъӣ (СААД) баргузор гардид.                  Тавре ба мухбири АМИТ «Ховар» муовини Котиби генералии СААД Ара Бадалян иттиллоъ дод, иштирокдорони ҷаласа оид ба авзоъ дар Афғонистон мубодилаи афкор карда, аз натиҷаи корҳои ба сомон расонидашуда ҳисобот ва доир ба нақшаи чорабиниҳо дар нимсолаи аввали соли оянда изҳори назар карданд. Дар ҷаласа ҳамоҳангсозони миллӣ оид ба Афғонистон ва мутахассисони кишварҳои аъзои СААД иштирок карданд.                     Гурӯҳи корӣ оид ба Афғонистон дар назди Шӯрои вазирони корҳои хориҷии Созмони аҳдномаи амнияти дастаҷамъӣ (СААД) 23 июни соли 2005 бо ташаббуси Федератсияи Русия созмон ёфта барои таҳияи чорабиниҳо дар мубориза бар зидди моддаҳои нашъаовар ва расонидани кӯмак дар барқарорсозии сохторҳои ҳокимияти давлатии Ҷумҳурии Исломии Афғонистон мусоидат мекунад.