ИМЗОИ СОЗИШНОМАИ НАВИ ҚАРЗ

                  Душанбе, 18 ноябр. (АМИТ «Ховар», Наргис Бойахмедова). – 17 ноябр намояндагони Бонки рушди Евразия ва Бонки «Лендесбанки Берлин» дар бораи ҷудо кардани маблағ бо мақсади ворид кардани таҷҳизоти бофандагӣ ба Тоҷикистон созишномаи додани қарзро имзо намуданд.                   Мухбири АМИТ «Ховар» хабар медиҳад, ки маблағи мазкурро ширкати «Олим Текстайл» бо мақсади сохтмони корхонаи нави калобаресӣ дар Тоҷикистон истифода хоҳад кард. Бо маблағи қарз аз Ҷумҳурии Федероли Олмон таҷҳизоти нави бофандагӣ харида, ҳаққи хизматҳои ба истифода додани корхона ва таҷҳизот пардохта мешавад.                    Бонки рушди Евразия, тибқи созишнома барои харидани таҷҳизоти бофандагӣ 22,6 миллион доллари ИМА ҷудо мекунад. Маблағи қарз бояд дар давоми 12 сол баргардонида шавад.