КӮМАКИ ИМА БА АФҒОНИСТОН

                  Кобул, 25 ноябр. (АМИТ «Ховар» — афғонистон.ру). – Иёлоти Муттаҳидаи Амрико барои расондани кӯмак ба вазорати мубориза ба муқобили маводи нашъадори Афғонистон 38,87 миллион доллар ҷудо кард. Ин маблағ барои ташкилу тақвияти мубориза ба муқобили хариду фурӯши ғайриқонунии маводи нашъадор дар вилоятҳои мамлакат истифода бурда мешавад. Хабар дода мешавад, ки 10 миллион доллари кӯмак барои иҷрои барномаҳои рушди соҳаҳои иқтисодиёти вилояти Ҳилманд сарф карда хоҳад шуд.                    Маблағи кӯмак инчунин барои расондани кӯмак ба аҳолии вилоятҳои Лӯгар, Балх, Бағлон, Бомиён, Форёб, Ғазнӣ, Ғӯр, Ҷузҷон, Каписа, Хӯст, Кундуз, Нуристон, Пактиё, Панҷшер, Парвон, Самангон, Сарипул, Тахор ва Вардак истифода бурда мешавад. Бояд гуфт, ки дар ин шаҳру вилоятҳо парвариши зироатҳои нашъадор пурра барҳам дода шудааст. Ба ин вилоятҳо барои иҷрои барномаҳои ободонӣ як миллион долларӣ дода хоҳад шуд.                     Намояндаи сафорати ИМА дар Кобул Энтони Вен зикр кард, ки маъмурияти мамлакаташ ба ҷидду ҷаҳди вазорати мубориза ба муқобили маводи нашъадор баҳои баланд медиҳад.                       Намояндагони вазорат изҳор намуданд, ки парвариши зироатҳои нашъадор дар 20 вилояти мамлакат пурра барҳам дода шудааст.