РӮЗИ ФАРҲАНГИ ҶАВОНОНИ СУҒД ДАР АШТ

                  Душанбе, 18 ноябр. (АМИТ «Ховар», Бекназари Абӯбакр). — Тибқи қарори раиси вилояти Суғд, бо мақсади равнақи ваҳдату худшиносии миллӣ, таҳкими робитаҳои дӯстонаи ҷавонони минтақаҳои гуногуни вилоят, ҷалб намудани ҷавонон ба корҳои ҷамъиятӣ, ошноӣ пайдо намудани онҳо аз таъриху фарҳанги ниёгон ва анъанаҳои миллӣ, 17 ноябр дар ноҳияи Ашт «Рӯзи фарҳанги ҷавонони вилояти Суғд» баргузор гардид.                   Сардори маркази матбуоти назди Раёсати ҷавонон, варзиш ва сайёҳии вилояти Суғд Азизхон Тӯраев ба мухбири АМИТ «Ховар» хабар дод, ки дар чорабинии мазкур зиёда аз 60 нафар ҷавонони лаёқатманду эҷодкор, аз қабили роҳбарони бахшҳои ҷавонон, варзиш ва сайёҳии шаҳру ноҳияҳои вилоят, ситораҳои эстрадаи вилоят, театр–студияи «Хандинкамон», олимону муҳаққиқони ҷавон ва донишҷӯёну хонандагон бо роҳбарии сардори Раёсати ҷавонон, варзиш ва сайёҳии вилояти Суғд Рустамҷон Ғиёсов иштирок намуданд.                    Субҳи барвақт дар даромадгоҳи ноҳияи Ашт, муовини раиси ноҳия ва ҷавонон меҳмононро пешвоз гирифта, онҳоро бо фаъолияти корхонаи саноатии ҶСК «Кони намак» ошно намуданд. Сипас, мулоқоти сардори Раёсати ҷавонон, варзиш ва сайёҳии вилояти Суғд Рустамҷон Ғиёсов бо сарбозони қисми низомии 14356 Б-и ноҳия доир гашта, иштирокчиёни Рӯзи фарҳангӣ аз зисту зиндагонӣ, хӯрду хурок ва ҷойҳои хоби сарбозон дидан намуданд.                     Дар толори маҷлисгоҳи мақомоти иҷроияи ҳокимияти давлатии ноҳияи Ашт мулоқоти раиси ноҳия Даврон Зоидов бо ҷавонони лаёқатманду эҷодкор, роҳбарони бахшҳои ҷавонон, варзиш ва сайёҳии шаҳру ноҳияҳои вилоят, олимону муҳаққиқони чавон ва донишҷӯёну хонандагон доир гашт.                      Иштирокчиёни Рӯзи фарҳангӣ аз масҷиди ҷомеи навбунёди ҷамоати Понғоз дидан намуданд.                      Қисми фарҳангии чорабинии мазкур дар толори кино-театри Лола баргузор гардид, ки дар он ситораҳои эстрадаи вилоят, театр–студияи «Хандинкамон» баромад намуда, роҷеъ ба мавзӯъҳои ҳаёту фаъолияти ҷавонон саҳначаҳо намоиш доданд.                       Мавриди ёдоварист, ки то 24 ноябр «Рӯзи фарҳанги ҷавонони вилояти Суғд» дар дигар шаҳру ноҳияиҳои вилоят баргузор хоҳад шуд.