САҲМИЯҲОИ РОҒУН ФУРӮХТА МЕШАВАНД

                   Душанбе, 25 ноября. (АМИТ «Ховар», Покиза Маҳмадбекова). — Саҳмгузорӣ ба сохтмони яке аз иншоотҳои азими энергетикии кишвар Нерӯгоҳи барқи обии Роғун, бо муроҷиати Президенти Ҷумҳурии Тоҷикистон, Ҷаноби олӣ Эмомалӣ Раҳмон имрӯзҳо аз ҷониби ташкилоту корхонаҳо ва табақаҳои гуногуни аҳолии кишвар дастгирии ҳамаҷониба пайдо намуда истодааст.                    Вобаста ба ин дар Бинои марказии Бонки давлатии амонагузории Ҷумҳурии Тоҷикистон «Амонатбонк »ҷамъомад бо иштироки васеъи роҳбарият ва кормандони бонк ҷиҳати дастгирии муроҷиати Ҳукумати Ҷумҳурии Тоҷикистон «Дар бораи андешидани тадбирҳои мушаххас оид ба дастгирии молиявии Нерӯгоҳи барқи обии «Роғун» доир гардид.                      Дар иртибот ба муроҷиати мазкур Раёсати бонк тасмим гирифтааст, ки аз ҳисоби фоидаи бонк ба маблағи 2 миллион сомонӣ саҳмияҳои сохтмони Нерӯгоҳи мазкурро харидорӣ намояд. Ҳамчунин аҳли кормандон ва мутахассисини бонк низ иқдом гирифтаанд, ки аз ҳисоби музди меҳнаташон саҳми худро дар сохтмони мазкур хоҳанд гузошт.