УСУЛҲОИ НАВИ МАБЛАҒГУЗОРӢ

                   Душанбе, 18 ноябр. (АМИТ «Ховар», Людмила Дубинина). — Тибқи нақшаи ислоҳоти соҳаи маорифи мамлакат, мактабҳои миёна ва таҳсилоти умумии ҳамагонӣ аз 1 январи соли 2010 сар карда, ба усули нави маблағгузорӣ, яъне таъминоти молиявии саросарии талабагон ва кормандони соҳаи маориф мегузаранд. Имрӯзҳо дар шаҳру ноҳияҳои мамлакат барои омӯзгорон бо мақсади омӯхтани усулҳои нави маблағгузорӣ семинарҳо ташкил карда мешаванд. Айни ҳол 1113 нафар кормандони шӯъбаҳои муҳосибаи 1169 мактаби 25 шаҳру ноҳияи ҷумҳурӣ дар чунин семинарҳо ширкат меварзанд. Семинарҳои мазкур имрӯзҳо дар ноҳияҳои Ишкошиму Рӯшон ва Ванҷу Тавилдара давом доранд.                   Ҳадафи семинарҳо ба муҳосибон омӯзонидани тарзу усулҳои нави тартиб додани нақшаи буҷет ва нақшаи хароҷоти маблағ, инчунин бо мақсадҳои муайян ва сарфакорона истифода бурдани маблағ мебошад. Мухбири АМИТ «Ховар» хабар медиҳад, ки чунин семинарҳо аз 9 то 14 ноябр барои муҳосибони мактабҳои ноҳияҳои Мурғобу Дарвоз ва Роштқалъа гузаронида шуданд. Қайд кардан лозим аст, ки то имрӯз 2462 мактаби миёна ва таҳсилоти умумии ҳамагонии 43 шаҳру ноҳияи мамлакат мувофиқи усулҳои нави маблағгузорӣ кор мекунанд.