ҲОСИЛИ РЕКОРДИИ ҒАЛЛА

                   Душанбе, 7 декабр. (АМИТ «Ховар», Бекназари Абӯбакр). – Дар давоми 11 моҳи соли ҷорӣ ҳаҷми умумии истеҳсоли маҳсулоти кишоварзӣ нисбат ба соли гузашта ба андозаи 110,8 фоиз иҷро гардида, ба 7 млрд. 602 млн. 106 ҳазор сомонӣ баробар шуд, ки соли гузашта ин нишондиҳанда 6 млрд. 377 млн. 502 ҳазор сомониро ташкил медод. Дар ин бора ба мухбири АМИТ «Ховар» дар Вазорати кишоварзӣ иттилоъ доданд.                    Ҳосили ҷамъовардаи зироати ғалладонагиҳо дар ҷумҳурӣ 1 млн. 259 ҳазор тоннаро ташкил дод, ки 90 фоизи онро гандум ташкил медиҳад. Дар таърихи ҷумҳурӣ чунин ҳосили зироати ғалладона бори аввал ба даст оварда шуд.                     Гуфтанист, ки ҷамъоварии маълумот оид ба ҳосили ғункардаи ниҳоии ғалла идома дошта, дар назар аст, ки ҳаҷми нишондодашуда боз ҳам зиёдтар шавад.