МУСОБИҚА БАРОИ БА ДАСТ ОВАРДАНИ ҶОМИ КФО

                   Душанбе , 5 декабр. (АМИТ «Ховар», Пайрав Назаров). — 4 декабр дар шаҳри Куала – Лумпури Малайзия тақвими бозиҳои дастаҳои футболи мамлакатҳои қитъаи Осиё барои ба даст овардани Ҷоми имтиёзи Конфедератсияи футболи Осиё баргузор гардид. Мусобиқаи мазкур аз 16 то 27 феврали соли 2010 дар варзишгоҳҳои «Сугатадаса» ва Коллеҷи шоҳии пойтахти Шри – Ланка — шаҳри Коломбо гузаронида мешавад.                   Мухбири АМИТ «Ховар» хабар медиҳад, ки дар ин мусобиқа дастаҳои мунтахаби футболи Тоҷикистон, Мянма, Шри – Ланка, Бангладеш дар гурӯҳи «А» ва дастаҳои мунтахаби футболи Ҳиндустон, ҶХДК, Туркманистон ва Қирғизистон дар гурӯҳи «Б» ширкат меварзанд.                     Дастае, ки дар ин мусобиқа ҷои аввалро ишғол менамояд, ба мусобиқаи футбол барои ба даст овардани Ҷоми Осиё дар соли 2011 роҳхат мегирад.                   Дастаи мунтахаби футболи Тоҷикистон 16 феврал бо дастаи мунтахаби Бангладеш, 18 феврал бо дастаи мунтахаби Шри – Ланка, 20 феврал бо дастаи мунтахаби Мянма қувваозмоӣ хоҳад кард. Қувваозмоиҳои ниманиҳоии мусобиқа 24 феврал ва қувваозмоии хотимавии он 27 феврал баргузор мегарданд.