САҲМИ ҶАВОНОН ДАР СОХТМОНИ НЕРӮГОҲ

                   Душанбе, 15 декабр. (АМИТ «Ховар», Пайрав Назаров). – 14 декабр таҳти раёсати раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Маликшо Неъматов маҷлиси навбатӣ баргузор гардид. Иштирокчиёни маҷлис масъалаи ҷудо кардани маблағро барои сохтмони НБО «Роғун» баррасӣ намуданд.                    Дар маҷлис қарор дода шуд, ки Кумитаи ҷавонон, варзиш ва сайёҳии назди Ҳукумати ҷумҳурӣ барои идомаи сохтмони Нерӯгоҳи барқи обии «Роғун» ба маблағи 50 ҳазор сомонӣ кӯмаки моддӣ хоҳад расонд.                      Инчунин қарор дода шуд, ки 23 декабр бо иштироки овозхонону мутрибон ва раққосони ҷавон барои коргарони НБО «Роғун» консерти идона намоиш дода шавад. Дар фарҷоми консерт ба коргарони нерӯгоҳ асбобу анҷоми варзишӣ тӯҳфа карда хоҳад шуд.