«САРПАРАСТ» БА БУНЁДИ «РОҒУН» САҲМ МЕГУЗОРАД

                 Роғун, 19 декабр. (АМИТ «Ховар», Тоҳирҷон Саидов). – Пешрафти соҳаи энергетика дар Тоҷикистон метавонад ба рушди иқтисоди миллӣ мусоидат намояд. Аз ин рӯ, бунёди нерӯгоҳҳои барқӣ дар қаламрави кишвар амри воқеӣ буда, ҷонибдорӣ ва дастгирии ҳар як шаҳрванди ватандӯсту баномусро тақозо мекунад.                   16-уми декабри соли ҷорӣ роҳбарияти Ҳаракати ваҳдати миллӣ ва эҳёи Тоҷикистон ва Ташкилоти ҷамъиятии хазинаи хайрияи «САРПАРАСТ» ҷиҳати ошноӣ пайдо намудан бо зисту зиндагонӣ ва дастгирии кормандони НБО «Роғун» ба шаҳри Роғун сафар карданд.                   Зимни сафар муовини раиси Кумитаи иҷроияи Шӯрои марказии Ҳаракати ҷамъиятии ваҳдати миллӣ ва эҳёи Тоҷикистон Қурбон Восиев, раиси Шӯрои куҳансолони Ҳаракати ваҳдати миллӣ ва эҳёи Тоҷикистон Нодир Одилов ва раиси ташкилоти ҷамъитии хазинаи хайрияи «САРПАРАСТ» Маҳмудҷон Муродов бо раиси шаҳри Роғун Исматулло Зайдов мулоқот карда, оид ба дастгирӣ ва ҳамовозӣ аз даъватҳои Прзиденти Ҷумҳурии Тоҷикистон Эмомалӣ Раҳмон изҳори андеша карданд. Зикр гардид, ки ҳар як шаҳрванди ба ору номус ва дорои ифтихори ватандорӣ бояд аз ин ташаббусҳои созандаю умумихалқӣ дар канор набошад.                  Маҳмудҷон Муродов гуфт, ки коллективи ТҶХХ «САРПАРАСТ» низ ин ташаббуси ватандӯстонаро дастгирӣ ва пуштибонӣ намуда, дар сохтмони НБО-и «Роғун» саҳми худро мегузорад. Тасмим гирифта шуд, ки дар арафаи Соли Нав ба кӯдакони ятим ва камбизоати шаҳри Роғун ва фарзандони сохтмончиёни НБО «Роғун» тӯҳфаҳои солинавӣ ирсол карда шавад. Инчунин, дар айёми ҷашни Наврӯз боз ин иқдом идома меёбад ва ба 300 кӯдакони ятим ва камбизоат тӯи сунатӣ барпо карда мешавад.                   Сипас, гурӯҳи корӣ аз сохтмони НБО-и Роғун дидан карда, бо коргарон аз наздик ҳамсӯҳбат шуданд. Дар назди коргарони НБО-и «Роғун» ансамбли «ДАРЁ»-и Кумитаи телевизион ва радио бо барномаи консертӣ хотири коргарону бунёдкорони ин иншооти муҳими асрро шод намуданд.