ТӮҲФАИ ДОНИШҶУЁНИ ДСТР БА КӮДАКИСТОН

                  Душанбе, 30 декабр. (АМИТ «Ховар», Бекназари Абӯбакр). — Дар баробари дигар табақаҳои ҷомеа донишҷӯён низ бо азму иродаи қавӣ мекӯшанд ба ниёзмандон дасти кӯмак дароз кунанд. Бо ин мақсад, донишҷӯёни факултети таърих ва муносибатҳои байналмилалии Донишгоҳи славянии Тоҷикистону Россия дар арафаи Соли Нави мелодӣ ба дастпарварони кӯдакистони «Чорбоғ» зиёфати идона ташкил намуданд.                     Дотсенти кафедраи таърих ва назарияи журналистикаи ДСТР Шариф Муллоев ба АМИТ «Ховар» иттилоъ дод, ки ин иқдом аз ҷониби худи донишҷӯён гирифта шуда, анъанаи хубе дар байни дигар донишҷӯёни донишгоҳу донишкадаҳои ҷумҳурӣ хоҳад шуд.                       Гуфтанист, ки дар баробари зиёфати идона ба ҳар як кӯдак тӯҳфаҳои солинавӣ тақдим шуда, дар фарҷом баҳри болидахотирии онҳо аз ҷониби донишҷӯён барномаи ҳунарӣ намоиш дода шуд.