Ғалабаи дастаи мунтахаби Тоҷикистон

Душанбе, 20 июл. (АМИТ «Ховар», Пайрав Назаров). – Дастаи мунтахаби миллии Тоҷикистон оид ба футбол дар раванди омодагирӣ ба бозиҳои интихобии мусобиқоти ҷаҳон дар соли 2014 — ум 18 июл бо клуби «Ал – Шоҳония» — и шаҳри Дохаи кишвари Қатар қувваозмоӣ намуда, бо ҳисоби 2:1 пирӯз шуд.Тавре сомонаи расмии Клуби футболи «Истиқлол» хабар медиҳад, тӯбҳоро ба дарвозаи дастаи ҳариф бозингарони дастаи футболи «Истиқлол» — и шаҳри Душанбе Юсуф Рабиев ва Иброҳим Рабимов ворид намуданд. 23 июл дастаи мунтахаби кишварамон дар раванди даври дуюми бозиҳои интихобии мусобиқоти ҷаҳон дар соли 2014 бо дастаи мунтахаби Сурия қувваозмоӣ менамояд. Бинобар номусоид будани вазъияти сиёсии Сурия бо қарори Федератсияи байналмилалии футбол ин бозӣ дар варзишгоҳи кишвари Ӯрдун сурат мегирад.