50 ҲАЗОРУ 700 СОМОНӢ САФОРАТИ ҶТ ДАР ҶИП САҲМИЯ ХАРИДОРӢ НАМУД

                 Душанбе, 8 январ. (АМИТ «Ховар», Жасмин Назарова). — 7 январи соли равон ҳамдиёрони тоҷикистонии сокини шаҳри Исломобод дар Сафорати Ҷумҳурии Тоҷикистон дар Ҷумҳурии Исломии Покистон ҷамъ омаданд. Сафири Ҷумҳурии Тоҷикистон дар ин кишвар Зубайдулло Зубайдов бо ҳамватанони муқими Ҷумҳурии Исломии Покистон вохӯрд.                   Дар ҷараёнӣ вохӯрӣ сафир роҷеъ ба мавзӯи барориши саҳмияҳои НОБ-и Роғун ва оғози харидории онҳо аз тарафи шаҳрвандони Тоҷикистон сӯҳбат намуд.                   Ба онҳо пеш аз ҳама оиди муроҷиатномаи Сардори давлат Эмомалӣ Раҳмон ба халқи Тоҷикистон барои саҳмгузорӣ дар сохтмони НБО-и Роғун ва ҳамовозии бузург пайдо кардани баромади Президент аз ҷониби шаҳрвандон маълумот дода шуд.                   Ҳамзамон барои ҳамдиёрон барномаи махсуси телевизиони Тоҷикистон ба таври мустақим пахш карда шуд, ки он аз рафти маъракаи бузурги харидории саҳмияҳои НБО-и Роғун дар тамоми гӯшаю канори Ватан маълумоти зинда пешкаши иштирокчиёни ҷаласа карданд. Баъдан Сафир З. Зубайдов дар ҷараёни суханронии худ ба таври мухтасар дар бораи нақш ва аҳамияти сохтмони НБО-и Роғун барои ояндаи халқ, иқтисодиёти ҷумҳурӣ ва ҳаёти тоҷикистониён, шарҳу тавзеҳот дод.                    Дар мулоқот шаҳрвандони тоҷики бурунмарзӣ иброз намуданд, ки онҳо ҳамчун тоҷикони ҳақиқӣ ва ватандӯсту ватанпараст омода ҳастанд, ки барои сохтмони ин иншооти барои Ватан ва халқ ҳаётан муҳим саҳми худро гузоранд.                   Дар натиҷа, 7 январ аз ҷониби шаҳрвандони тоҷики муқими шаҳри Исломобод ба миқдори 7 ҳазор сомонӣ маблағ ҷамъоварӣ гардид. Ҳамдиёрони дигари мо, ки дар шаҳрҳои гуногуни Покистон кору таҳсил менамоянд, аз ин маъракаи бузург огоҳ гардида, ба Сафорат иттилоъ доданд, ки онҳо низ омода ҳастанд саҳмия бихаранд ва дар сохтмони НБО-и Роғун саҳмгузор бошанд. Ҷараёни харидории саҳмияҳо идома дорад.                     Инчунин бояд қайд кард, ки аз ҷониби кормандони Сафорат ба миқдори 43 ҳазору 700 сомонӣ маблағ барои харидорӣ кардани саҳмияҳо ҷамъ карда шуд.                     Дар маҷмӯъ Сафорати Ҷумҳурии Тоҷикистон ба миқдори 50 ҳазору 700 сомонӣ саҳмияҳо харидорӣ намуд.