ФАЪОЛИЯТИ САМАРАБАХШИ КОРХОНАҲОИ ВАЗОРАТ

                  Душанбе, 22 январ. (АМИТ «Ховар», Кристина Эрлих). — Имрӯз дар Вазорати энергетика ва саноати ҷумҳурӣ бахшида ба натиҷаҳои фаъолияти вазорат ва корхонаю муассисаҳои тобеи он дар соли 2009 нишасти матбуотӣ баргузор гардид.                     Вазири энергетика ва саноати ҷумҳурӣ Гул Шералӣ ба журналистон хабар дод, ки соли гузашта аз 824 корхонаи соҳа 474 корхона истеҳсоли маҳсулотро зиёд карданд, 92 корхона бо сабабҳои гуногун аз кор монданд ва 258 корхона аз ӯҳдаи иҷрои нақшаҳои пешбинишуда набаромаданд.                     Вазир зикр кард, ки соли гузашта дар мамлакат истеҳсоли тилло то андозае кам шуд. Яке аз сабабҳои кам шудани истеҳсоли тилло муддати тӯлонӣ тармиму таҷдид кардани корхонаи муштараки тиллои «Зарафшон» мебошад.                      Г.Шералӣ дар ҷавоби саволи журналистон дар масъалаи ворид гардидани гази табиӣ аз хориҷа ба қаламрави Тоҷикистон ҷавоб дода гуфт, ки айни ҳол Тоҷикистон ҳазор метри мукааб газро аз Ӯзбекистон бо қимати 231 доллари ИМА мехарад. Ҳар рӯз Тоҷикистон аз Ӯзбекистон 17- 18 ҳазор метри мукааб газ мегирад. Гази табиӣ пеш аз ҳама ба баъзе корхонаҳои саноатӣ, аз ҷумла Ширкати саҳҳомии «Корхонаи алюминии Тоҷикистон», Ҷамъияти саҳҳомии «Тоҷиксемент» ва Маркази барқу гармидиҳии Душанбе дода мешавад. Гази табиӣ ба аҳолӣ аз рӯи имкониятҳои мавҷуда дода мешавад, гуфт вазир.                       Қайд карда шуд, ки айни ҳол сохтмони НБО «Роғун» босуръат давом дорад. Ҳоло дар ин ҷо бештар аз 6000 коргару мутахассис ва зиёда аз 700 навъу намуди техника кор мекунанд. Дар Роғун сохтмони ду туннел ва ҳуҷраҳои трансформаторӣ давом дорад. Комиссияи махсус рӯзи бастани дарёи Вахшро муайян менамояд.                        Корхонаҳои соҳа соли гузашта ба маблағи 6 миллиарду 262 миллион сомонӣ маҳсулот бароварданд.                          Вазорат бо корхонаю муассисаҳои гуногуни саноатию энергетикии мамлакатҳои хориҷӣ ҳамкорӣ мекунад. Аз ҷумла, бо кӯмаки мутахассисони Куриёи ҷанубӣ дар маҳалҳои Тоҷикистон, ки суръати вазиши шамол аз 5 метр дар як сония зиёд аст, нерӯгоҳҳои барқии шамолӣ сохта мешаванд. Мо инчунин бо ширкатҳои хориҷӣ дар бобати сохтмони иншоотҳои энергетикӣ, аз ҷумла нерӯгоҳҳои хурди барқӣ ҳамкорӣ мекунем, гуфт дар хотима Гул Шералӣ.