СЕМЕНТҲОИ «РОҒУНГЭС»-РО ДАР ЛУЧОБ ФУРӮХТАНД

                   Душанбе, 6 январ. (АМИТ «Ховар», Лаззат Диловарзод).- Бино ба иттилои шӯъбаи пешгирии Агентии назорати давлатии молиявӣ ва мубориза бо коррупсияи ҶТ, рӯзи 16 – уми ноябри соли 2009 кормандони шӯъбаи минтақавии агентии мазкур дар ноҳияи Рашт, ҳангоми санҷиши назорати қабул намудани сементи ба ҶСК «РоғунГЭС» мутааллиқбуда, муайян намуданд, ки ронандаи автомашинаи КАМАЗ – 54-10, рақами давлатиаш 46- 80А 01 – РТ, Бердиев Зубайдулло Одинаевич, мувофиқи борхати нақлиётӣ рақами 11371 аз 10 –уми ноябри соли 2009 аз корхонаи воҳиди давлатии «Тоҷиксемент» 13 тоннаю 900 кг сементи ба сохтмони НБО –и «Роғун» интиқолёфта, 3 тоннаю 900 кг кам ворид кардааст. Дар вақти санҷиш ва пурсиш ронанда З. О. Бердиев баён доштааст, ки дар маҳаллаи Лучоби шаҳри Душанбе з тоннаю 900 кг –ашро ба шахси ношинос фурӯхтааст. Худи ҳамон рӯз ронандаи дигари автомашинаи КАМАЗ – 5410 рақами давлатиаш 29 – 46В 01 –РТ Ҳайдаров Саидбек Турсунович аз ҳисоби 14 тоннаю 300 кг сементи ба ҶСК РоғунГЭС» мансуббуда, 4 тоннаю 300 кг- и онро ба маблағи 2881 сомонӣ дар маҳаллаи Лучоби шаҳри Душанбе ба як шахси ношинос фурӯхтааст.                   — Маблағи зарари расонидашуда барқарор карда шуда, нисбати ҷинояти содиркардаи ронандагон З.О. Бердиев ва С.Т. Ҳайдаров, ки дар моддаи 245 – (азонихудкунӣ ё исрофкорӣ) –и КҶҶТ пешбинӣ шудааст, тафтишот давом дорад.