ТВ «САФИНА» ҶАРАЁНИ СОХТМОНИ «РОҒУН»-РО ҲАМАҶОНИБА ИНЪИКОС МЕНАМОЯД

                 Душанбе, 13 январ. (АМИТ «Ховар», Бекназари Абӯбакр). — Муассисаи давлатии «Телевизиони Сафина» дар соли 2009 корҳои таблиғотиву ташвиқотиро дар самти сазовор истиқбол гирифтани 20-умин солгарди Истиқлолияти давлатии Ҷумҳурии Тоҷикистон ва Соли бузургдошти Имоми Аъзам ба таври васеъ ба роҳ монда, як қатор барномаҳои ҷолиби адабӣ ва фарҳангию маърифатӣ таҳия ва пешкаши бинандагон намуд. Ин нуқтаро 13 январ, зимни нишасти матбуотӣ директори Муассисаи давлатии «Телевизиони Сафина» Лутфулло Давлатов зикр намуд.                    Ӯ афзуд, ки дар ин давра амру фармонҳои Президенти Ҷумҳурии Тоҷикистон, Қарорҳои Ҳукумати Ҷумҳурии Тоҷикистон, ҷараёни сафарҳои кории Сарвари давлат ба шаҳру навоҳии мамлакат ва сафарҳои расмии ӯ ба мамолики дуру наздик тариқи нашрҳои махсус ва барномаҳои иттилоотӣ ба забонҳои тоҷикӣ, русӣ ва англисӣ дар сатҳи зарурӣ инъикос гардиданд.                   Дар ин давра, бо мақсади инъикоси фаъолияти вазорату идораҳо ва ташкилоту муассисаҳо дар самти пешгирӣ ва коҳиш додани таъсири манфии бӯҳрони ҷаҳонии молиявию иқтисодӣ ба хоҷагии халқи мамлакат, барномаи мустақими «Робита» рӯи эфир омад, ки тавассути он роҳбарони вазорату идораҳои давлатӣ мустақиман ба суолҳои сершумори тамошобинон посух гуфта, дар бораи ҷараёни иҷрои дастуру супоришҳое, ки дар Паёми Президенти Ҷумҳурии Тоҷикистон Эмомалӣ Раҳмон ба Маҷлиси Олӣ зикр гардидаанд, маълумот доданд.                   «Имрӯзҳо аҳли эҷоди муассиса аз рӯи тасмимгириҳои роҳбарияти олии сиёсии мамлакат дар самти татбиқи амалии тарҳи НБО «Pоғун» талош доранд, ки ҷараёни сохтмони ин иншооти бузурги асрро ҳамаҷониба инъикос намоянд. Намоишҳои телевизионии «Водии Нур», «Ду рӯзи Роғун», «Мулоҳиза», «Биёед, бигӯем», «Афкор», «Андешаҳо», «Иншооти аср», «Башорат», «Шакл» дар бораи рафти сохтмон ва фурӯши саҳмияҳои нерӯгоҳ таҳия ва пахш гардиданд, ки фикр мекунам саҳми аҳли эҷоди «Телевизиони Сафина» дар бунёди ин иншооти муҳими стратегӣ аст», — гуфт дар хотима Л. Давлатов.