ҲАҶМИ МАҶМӮИ МАҲСУЛОТИ ДОХИЛӢ ДАР МОҲИ ЯНВАР

Душанбе,  26  феврал. (АМИТ «Ховар»,  Покиза  Маҳмадбекова). —  Аз  рӯи  маълумоти  Кумитаи давлатии  омори  ҷумҳурӣ   моҳи  январ  ба  маблағи  бештар  аз  як  миллиард  сомонӣ  маҳсулоти  умумии  дохилӣ  истеҳсол  карда  шуд, ки  нисбат  ба  нархҳои  муқоисавии  соли  2009 – ум  104, 2  фоизро ташкил  медиҳад. Моҳи  январи  соли  равон  дар  мамлакат ба  маблағи  571,3  миллион  сомонӣ   маҳсулоти  саноат  истеҳсол  карда шуд. Ин  нисбат ба ҳаҷми  умумии  истеҳсоли  маҳсулоти  саноат  дар  моҳи  январи  соли  2009 — ум 103,2  фоизро ташкил  медиҳад. Мухбири  АМИТ «Ховар»  хабар  медиҳад,  ки  корхонаҳои  вазорати  энергетика  ва  саноати  ҷумҳурӣ  моҳи  январ  ба  маблағи  150,9  миллион  сомонӣ  маҳсулот  истеҳсол  намуданд. Ин  нисбат ба  ҳамин  давраи  соли  гузашта 15,6  фоиз  зиёд  мебошад.   Корхонаҳои  коркарди  пахта  дар ин  давра  ба  маблағи  62,8  миллион  сомонӣ маҳсулот  бароварданд, ки   аз  соли  гузашта 15,1  фоиз  зиёд  аст. Корхонаҳое, ки  ба   вазорату  идораҳои  Ҷумҳурии  Тоҷикистон  тобеъ  нестанд,  моҳи  январи  соли  2010  ба  маблағи 239,9  миллион  сомонӣ  маҳсулоти  саноат   истеҳсол  намуданд. Ин  нисбат ба  моҳи  январи  соли 2009 – ум  1  фоиз  зиёд  мебошад.