ҲИСОБОТИ КӮМАКИ БЕРУНАИ ТОҶИКИСТОН

Душанбе, 15 феврал. (АМИТ «Ховар», Бекназари Абӯбакр). — Кумитаи давлатии сармоягузорӣ ва идораи амволи давлатии Ҷумҳурии Тоҷикистон дар ҳамкорӣ бо лоиҳаи кӯмаки техникии Барномаи рушди СММ маълумотномаи ҳарсолаи иттилоотии «Ҳамкорони рушд — 2009-2010» ва «Ҳисоботи кӯмаки беруна — 2008»-ро нашр намуд. Нашри навбатии маълумотномаи «Ҳамкорони рушд — 2009-2010» шумораҳои навоваришудаи нашрҳои пешинро, бо назардошти тағйиротҳои босуръате, ки дар фазои кӯмаки беруна ҷой доранд, дар бар мегирад. Мақсади нашри маълумотномаи мазкур — такмили маълумотнокии тамоми иштирокчиёни ҷараёни расонидани кӯмаки беруна ба Тоҷикистон, дар бораи хусусият ва самтҳои фаъолияти ҳар як ҳамкори рушд, бо назардошти тахассуси онҳо ба ин ё он лоиҳаҳои минтақавӣ ва соҳавӣ, мебошад. Гуфтанист, ки дар «Ҳисоботи кӯмаки беруна — 2008» шарҳи вазъи корро бо ҷалб ва истифодаи кӯмаки беруна, амалиёти нишондодҳои асосӣ, ки тавсифгари истифодаи босамари кӯмаки беруна аст, инчунин маълумоти мушаххас дар бораи ҳар як лоиҳае (созишнома), ки аз ҳисоби ҷалби кӯмаки беруна дар ҷумҳурӣ иҷро мешаванд, таҳия шудааст.