ҶАВОНОНИ ТОҶИК «ЯК ВАҶАБ АЗ ОСМОН»-РО ТАМОШО КАРДАНД

Душанбе, 16 феврал. (АМИТ «Ховар», Марзия Саидова).-Дар Душанбе ҳафтаи филмҳои эронӣ анҷом ёфт. Ин чорабинии фарҳангӣ дар доираи даҳаи Фаҷр  бо ибтикори бунёди фарҳангии «Аҷам»-и назди маркази фарҳангии ҷавонон-  «Ориёно» ва Ройзанаи фарҳангии Сафорати Ҷумҳурии Исломии Эрон дар Ҷумҳурии Тоҷикистон ташкил ва гузаронида шуд. Муддати як ҳафта ҷавонон ва наврасони тоҷик филмҳои «Сом», «Наргис», «Кафши сафед», «Борон» «Ҳаёт», «Қосидакҳо дар бод мерақсанд» ва  «Як ваҷаб аз осмон» -ро тамошо карданд.   Назар ба иттилои Раиси Ройзанаи фарҳанги Сафорати Эрон дар Тоҷикистон Муҳаммадҳусайн Амир Ардӯш,  ҳадаф аз ташкили чунин чорабинӣ таҳкими ҳамкориҳои фарҳангӣ байни ду кишвар ва шиносоии ҷавонони тоҷик бо ҳаёту рӯзгори ҷавонон ва наврасони эронӣ мебошад. Филмҳои мазкур гуногунмавзӯъ буда, он аз пешрафти соҳаҳои иқтисодию иҷтимоии ин кишвар ва нақши ҷавонону наврасони он дар рушди ҷомеаи Эрон нақл мекунад.