ГУСТАРИШИ МУНОСИБАТҲОИ ДӮСТОНАИ ТОҶИКИСТОНУ ТУРКМАНИСТОН

Душанбе,  26  феврал. (АМИТ «Ховар», Людмила  Дубинина). – Бо  даъвати  Президенти  Ҷумҳурии  Тоҷикистон  Эмомалӣ  Раҳмон  Президенти  Туркманистон  Қурбонгулӣ  Бердимуҳаммадов  дар  арафаи   иди  Наврӯз  ба  Тоҷикистон  ташриф  меорад. Муносибатҳои   дӯстона  ва  ҳамкории  Тоҷикистону  Туркманистон  аз  27  январи  соли  1993,  яъне   аз  рӯзи  имзои   протоколи   муқаррар  намудани   муносибатҳои  дипломатии   ҳар  ду  мамлакат   сол то  сол   дар  рӯҳияи  ҳусни  ҳамҷаворӣ  ва   мутақобилан  муфид  ривоҷ  меёбад.   Бояд  гуфт, ки  мавқеи   ҳар  ду  мамлакат  роҷеъ ба  бисёр   проблемаҳои  дорои  аҳамияти   байналхалқию  минтақавӣ  комилан  мувофиқат  мекунанд. Қайд  кардан  лозим  аст, ки  ҳаҷм  ва  маблағи  хариду  фурӯши  мол  дар  байни  Тоҷикистону  Туркманистон  сол то сол  меафзояд. Аз ҷумла,  маблағи  муомилоти  мол  байни  ҳар ду  кишвар  соли  2009 – ум 63, 9  миллион  долларро  ташкил  дод. Аз  Тоҷикистон  ба  Туркманистон  асосан   сабзавоту  мева ва сими алюминий  фиристода  мешавад. Туркманистон ба  Тоҷикистон  маҳсулоти  нафт.  сӯзишворӣ,   равғани  наботӣ,  қувваи барқ,   гази  фишурда ва  битум  мефурӯшад. Сафарҳои  расмии   сарони  ҳар ду  давлат  ба  мамлакатҳои  ҳамдигар  дар  охири  соли  2007  ба  муносибатҳо  ва  ҳамкории  ҳар ду  кишвар  нерӯи  тоза бахшиданд. Умуман,  гуфтан  мумкин  аст, ки   муносибатҳои  Тоҷикистону  Туркманистон  ба  туфайли  ҷидду  ҷаҳди  роҳбарони  ҳар  ду  мамлакат   муттасил  густариш  меёбанд.