ХУҶАНДИҲО БА 20-СОЛАГИИ ИСТИҚЛОЛИЯТ АЗ ИМРӮЗ ОМОДАГӢ МЕГИРАНД

Душанбе, 3 феврал. (АМИТ «Ховар», Бекназари Абӯбакр). — Омодагиҳо ба таҷлили ҷашни 20-солагии Истиқлолияти давлатии Ҷумҳурии Тоҷикистон, ки санаи 9 сентябри соли 2011-ум ба вуқӯъ мепайвандад, дар маркази вилояти Суғд торафт суръат мегиранд.             Тибқи як қарори махсуси раиси шаҳри Хуҷанд корхонаю ташкилот ва муассисаҳои қаламрави шаҳр вазифадор гардидаанд, ки барои таҷлили сатҳи баланди ҷашни Истиқлол ба корҳои ободонӣ вусъати ҳамаҷониба бахшида, бо истифода аз манбаъҳои мавлағгузорӣ сохтмони иншооти таъйиноти истеҳсолӣ ва иҷтимоию фарҳангиро ба нақша гиранд. Воҳидҳои сохтории мақомоти иҷроияи ҳокимияти давлатии шаҳр вазифадор шудаанд, ки ҷиҳати тарғиби дастовардҳои солҳои Истиқлол, фазои сулҳу осоиш ва меҳнати садоқатмандонаи коркунони ҳамаи соҳаҳои хоҷагии халқ, ба хотири рушд ва шукуфоии Тоҷикистони соҳибистиқлол, дар вуҷуди мардумон парваридани ҳисси баланди ватандорӣ, худогоҳию хештаншиносӣ ва  ҳуввияти миллӣ, тадбирҳои мушаххас андешанд.