ИТТИҲОДИ АВРУПО БА ЗАРАРДИДАГОНИ ВАНҶ КӮМАК МЕРАСОНАД

Душанбе, 3 феврал. (АМИТ «Ховар», Наргис Бойаҳмедова). — Комиссияи Аврупо барои ҷудо кардани 42,080 ҳазор евро ба сокинони зарардидаи ноҳияи Ванҷ қарор қабул кард. Ёдовар мешавем, ки 2 январи соли ҷорӣ заминларзаи сатҳи миёна  ин ноҳияи вилояти мухтори кӯҳистони Бадахшонро ба ларза даровард. Дар натиҷа мавзеъҳои Ускроғ, Пунчиҷӯгунӣ, Панҷшанбеобод ва маркази маъмурии ноҳияи Ванҷ, зиёда аз 1000 хонаи истиқоматӣ зарар диданд. Зиёда аз 100 хона пурра хароб гардида 640 нафар сокинон шароити оддитарини зистро аз даст доданд, 920 хонаи истиқоматӣ қисман хароб шуда, айни ҳол ба таъмири асосӣ муҳтоҷ доранд. Тавре ба АМИТ «Ховар», аз намояндагии Иттиҳоди Аврупо иттилоъ доданд, кӯмаки мазкур барои харидории хаймаҳои гарм, асбобҳои барои сохтмон зарурӣ, бел, зоғнул, брезент, курпа, тагсарӣ, ҷойпӯши хоб, лавозимоти хӯрокпазӣ, зарфи обгирӣ ва дигар маводи беҳдоштӣ сарф карда мешаванд. Ҳамчунин кӯмаки тиббӣ-равонӣ низ ба зарардидагони ин офати табиӣ расонида мешавад. Кӯмаки башардӯстона ба воситаи ҷамъияти Салиби Сурх, ки бо дастгирии молиявии Бунёди расонидани кӯмак дар вазъияти фавқулодда (DREF) -и Федератсияи байналмиллии Ҷамъияти Салиби Сурх ва Ҳилоли Аҳмар расонида хоҳад шуд (IFRC).