ИЗҲОРОТИ МУШТАРАКИ ИТТИФОҚИ ЖУРНАЛИСТОН ВА АМВАОМТ

Душанбе,  24  феврал. (АМИТ «Ховар», Фарангис  Раҳимова). —  Иттифоқи  журналистон  ва Анҷумани  миллии воситаҳои  ахбори оммавии мустақили  Тоҷикистон 23  феврал  дар  масъалаи   таъқиби  журналистон  вобаста ба  фаъолияти  касбии  онҳо изҳороти  муштарак  дарҷ  намуданд. Дар  изҳороти  муштараки раиси  Иттифоқи  журналистон  Акбаралӣ  Сатторов  ва  раиси  Анҷумани  миллии воситаҳои  ахбори  оммавии мустақили  Тоҷикистон  Нуриддин  Қаршибоев  изҳори ташвиш  карда  мешавад, ки  журналистон  дар  аксари  мавридҳо  барои  истифодаи  ҳуқуқашон  барои озодии  ақида таъқиб  карда  мешаванд. Ин  ба  меъёрҳои  ҳуқуқи  миллӣ ва  байналмилалӣ  комилан  мухолиф  мебошад. Дар  изҳорот   гуфта  мешавад, ки   гурӯҳи  шахсони номаълум  узви  Иттифоқи  журналистон   Маҳдӣ  Собировро  барои   навиштани  мақола  дар  бораи   ислоҳоти артиш  таҳти  унвони «Саркашӣ  аз  хизмати  сарбозӣ»  дар  ҳафтаномаи «Дунё»  аз  22  октябри  соли  2009 ва  пурсиши  ақидаи  коршиносон  дар  ҳафтаномаи  «Озодагон» аз  29  октябри  соли  2009 дар  давоми  се  моҳ  таъқиб   менамояд. Як моҳ  пеш  журналисти  дигар,  мухбири   радиои «Озодӣ»  Абдулмӯъмин  Шерхонов  ҳадафи таҳдид  ва таъқиби  комиссари  ҳарбии  ноҳияи  Восеъ  Искандар  Назаров  қарор  гирифта буд. А.Шерхонов  дар  ҳафтаномаи  «Миллат»  дар бораи  ҳалокати   хизматчии  ҳарбӣ   Комрон  Тешаев  мақола  чоп  кардааст.  Сабаби таъқиби  журналист  аз  ҷониби  комиссари  ҳарбӣ  ҳамин  мақола  мебошад. Маҳдӣ  Собиров  ва  Абдулмӯъмин  Шерхонов  ба  созмонҳои журналистӣ ва ҳифзи  ҳуқуқ  муроҷиат  карда,  зикр  менамоянд,  ки  вобаста ба  таъмини  бехатарӣ  ва  саломатии   наздиконашон  ба ташвиш  афтодаанд. Иттифоқи  журналистон ва Анҷумани  миллии воситаҳои  ахбори  оммавии мустақили  Тоҷикистон дар  робита  Прокуратураи  генералӣ  ва  мақомоти  дигари  салоҳиятдори   муҳофизи  қонуни  ҷумҳуриро   даъват  менамоянд, ки  воқеаҳои  зикргардидаро   ҳадафи тафтиш  қарор  диҳанд.