ПРЕЗИДЕНТИ РУСИЯ САРОНИ ДАВЛАТҲОИ ИДМ — РО БА ҶАШНИ ҒАЛАБА ДАЪВАТ НАМУД

Маскав,   5  феврал. (АМИТ «Ховар» — ИТАР — ТАСС). – Президенти  Федератсияи  Русия  Дмитрий  Медведев  сарони  давлатҳои  ИДМ – ро  даъват  намуд, ки  дар ҷашни  65 – солагии  Ғалаба  иштирок  намоянд.  Ҷашни  мазкур  9  май  дар   шаҳри  Маскав  гузаронида  мешавад. Инчунин  ба  шарафи  иди  Ғалаба  дар  пойтахти  Русия  мулоқоти  ғайрирасмии  сарони  давлатҳои  ИДМ  баргузор  мегардад. Дар  ин  бора  котиби  иҷроияи  ИДМ Сергей  Лебедев  хабар  дод. Вай  зикр  намуд, ки  соли 2011   ба ташкили  Иттиҳоди  Давлатҳои  Мустақил  20  сол  пур  мешавад. Дар  Маскав бахшида ба  ин  санаи  муҳим  мулоқоти  роҳбарони  давлатҳои  ИДМ  ташкил  карда  хоҳад  шуд. С.Лебедев  изҳор  намуд, ки  раёсати  Иттиҳоди  Давлатҳои  Мустақилро  айни  ҳол  Русия  ба  ӯҳда  дорад. Дар  ҷараёни  раёсати  Русия   дар  доираи  ИДМ  тадбирҳои гуногун  ба  нақша  гирифта шудаанд. Яке  аз онҳо   гузаронидани  анҷумани  иқтисодии   давлатҳои  ИДМ  дар  Маскав   5  марти  соли  равон  мебошад.  Инчунин  26  март  маҷлиси  Шӯрои  вазирони  корҳои  хориҷии  мамлакатҳои  ИДМ  баргузор  мегардад. Баъдан   дар  доираи анҷумани  иқтисодии  Петербург  бо  иштироки  муовинони  сарвазирони  мамлакатҳои  Иттиҳод  машварат  гузаронида  хоҳад  шуд.