САФИРИ ТОҶИКИСТОН ДАР РУСИЯ ОВОЗХОНИ МАШҲУРРО ТАБРИК НАМУД

Душанбе,  2 феврал. (АМИТ «Ховар», Наталя  Михайлова). – Сафири  Ҷумҳурии  Тоҷикистон  дар  Федератсияи  Русия  Абдулмаҷид  Достиев,  раиси  Шӯрои  минтақавии  Созмони  ҷамъиятии «Маркази  фарҳангии  тоҷикон» Хуршеда  Ҳамроқулова,  инчунин  кормандони  сафорат   31 январ  ба  аёдати  Ҳунарпешаи  мардумии  Иттиҳоди  Шӯравӣ,  профессор  Ҳанифа  Мавлонова  рафта,  ӯро  ба  муносибати рӯзи  таваллудаш  табрик  намуданд. А.Достиев   ҳунарпеша  ва овозхони  машҳурро табрик  намуда,  гуфт, ки  мувофиқи  дастури  Президенти  Ҷумҳурии  Тоҷикистон  Эмомалӣ  Раҳмон  барои  ӯ 10  ҳазор  сомонӣ  ҷудо  карда шудааст. Сафир  зикр  намуд, ки   халқи  тоҷик  саҳми  калони  Ҳанифа  Мавлоноваро дар  рушди  санъат  ва  ҳунари  миллӣ ҳеҷ  гоҳ  фаромӯш  намекунад.  Овози  беҳамтои  Ҳ.Мавлонова  имрӯз  ҳам дар  барномаҳои радио  ва телевизиони тоҷик  садо  медиҳад. Ҳанифа  Мавлонова  дар  саросари  ҷаҳон  ҳамчун  хонандаи  беҳтарини  сурудҳои  «Шашмақом»  ва  сурудҳои  дигари  анъанавии  миллӣ  ва  классикӣ   шӯҳрат  пайдо  кардааст. Мавсуф  тӯли  солҳои  фаъолияташ  дар  Донишкадаи  давлатии  ҳунарҳои  зебои ба  номи  Мирзо Турсунзода  теъдоди  хеле  зиёди  ҳунармандонро тарбия  намуда,  ба  майдони  ҳунар  раҳнамун  сохтааст. Ҳ.Мавлонова  аз  сафир  хоҳиш  намуд, ки  аз  номи  ӯ ба  Президент  ва  халқи  Тоҷикистон  барои  ғамхорӣ  ва   кӯмакашон  изҳори  сипос  намояд. Аз  дафтари  матбуоти   сафоратхонаи  Тоҷикистон  дар  Русия  ба  АМИТ «Ховар»  хабар  доданд, ки  духтари  Ҳанифа  Мавлонова  —  Гулнор  баъди  мулоқоти  сафир бо  модараш  ба  сафоратхона  мактуб  навишта,  изҳори  сипос    намудааст.  Дар  мактуби  ӯ  инчунин  гуфта  мешавад:  «Аз он  хурсандам, ки  Шумо  вақт  ёфта  ба  аёдати  модари ман  омадед ва  ӯро  ба  муносибати рӯзи  таваллудаш  табрик  кардед. Ҳамон рӯз  хушбахтии  модари  маро  ҳадду  канор  набуд. Аёдати Шумо   барои  модарам  ид  мебошад. Умедворам, ки   кормандони  сафорат  минбаъд  ҳам  вақт  ёфта,  ба  аёдати  ӯ  хоҳанд  омад. Чунин  мулоқотҳо  дили   модарамро  ба  ватан  гармтар  месозанд». Мухбири  АМИТ «Ховар»  ёдовар  мешавад, ки  Ҳанифа  Мавлонова  соли  1924 дар  шаҳри  Хуҷанд  таваллуд  шудааст.  Ӯ соли  1936  Омӯзишгоҳи  мусиқии  Ленинободро  хатм  кардааст.  Тӯли  солҳои  1937 – 39  дар  Театри  тамошобини  навраси  Ленинобод  кор карда,  аз  соли  1939 то  соли  1943   овозхони театри   мусиқии  мазҳакавӣ  буд.  Аз  соли  1943  ҳунарпешаи  Театри  опера  ва  балети  ба  номи  С.Айнӣ  буд.  Ҳ.Мавлонова  солҳои  1952 – 59   дар  Консерваторияи  Маскав  таҳсил  кардааст.  Ӯ  сазовори  унвони  олии  Ҳунарпешаи  мардумии  Иттиҳоди  Шӯравӣ  гардидааст. Ҳанифа  Мавлонова   дар   операҳои «Пӯлод ва  Гулрӯ»,  «Евгений  Онегин», «Княз  Игор», «Трубадур», «Найрангҳои  Майсара», «Домоди  номдор» ва  ғайра  нақшҳои  асосии  занонаро  бозӣ  кардааст.  Ӯ  депутати  Шӯрои  олии ИҶШС  даъвати  чорум  буда,  бо  ордени  Ленин  ва  ордену  медалҳои дигар  мукофотонида шудааст.