СОҲИБКОРОНИ ТУРКИЯ БА СОХТМОНИ НБО «РОҒУН» МАРОҚ ЗОҲИР МЕКУНАНД

Анқара, 5  феврал. (АМИТ «Ховар»,  Катерина  Аксакова). —  4 феврал  дар  Анқара  маҷлиси  Шӯрои  масъалаҳои  ҳамкории  иқтисодии  берунии  Ҷумҳурии  Туркия  баргузор  гардид.  Дар он  роҳбарони намояндагиҳои  дипломатӣ,  шӯроҳои  ҳамкории  иқтисодии  дуҷониба,  вазоратҳо,   идораҳо  ва корхонаю  ширкатҳои  калонтарини  Туркия  ширкат  варзиданд. Дар маҷлис  вазири  корҳои  хориҷии  Туркия  Аҳмад  Довудӯғлӣ,  вазири  энергетика  ва  захираҳои табиӣ Танер  Йилдиз ва  вазири  давлатии  ин  мамлакат Зафар  Чоғлоён  маърӯза  карданд. Дар  маҷлис   сафири  Ҷумҳурии  Точикистон  дар  Туркия  Шӯҳрат  Султонов  низ   ширкат  варзид  ва  сухан  кард. Вай ҳозиронро  бо  вазъияти  имрӯза   ва  нақшаҳои ояндаи   муносибатҳои  тиҷоратию  иқтисодии  Тоҷикистону  Туркия   шинос  намуд.  Қайд  карда шуд, ки  дар  Тоҷикистон  барои  гузоштани  маблағ  ва  ҳамкорӣ  дар  соҳаҳои  гуногуни  иқтисодиёт  шароити  мусоид  фароҳам оварда шудааст. Дар  Тоҷикистон  захираҳои  сарватҳои табий  хеле  фаровонанд.  Ҳоло  дар  озмуни  ба  даст  овардани  ҳуқуқи   мавриди  баҳрабардорӣ  қарор додани  кони  нуқраи  «Кони Мансури калон» ширкати  «Йилдизлар» — и  Туркия  низ  иштирок  дорад. Сафир   таваҷҷӯҳи  соҳибкорону тоҷирони  туркро  ба  барномаҳои гуногуни  иқтисодии  дар  Тоҷикистон  тарҳрезӣшуда  ҷалб  намуд, ки   ба  сармоягузории  хориҷӣ  эҳтиёманданд. Ш.Султонов  изҳор  намуд, ки захираи  умумии  гидроэнергетикии  Тоҷикистон 527   миллиард  киловатт – соатро  ташкил  медиҳад,  имрӯз  ҳамагӣ  5  фоизи он  истифода бурда  мешавад. Сафир  дар  ҷавоби  саволи ҳозирон  дар  бораи  аҳамияти  сохтмони  НБО «Роғун»   ба   иқтисодиёти  Тоҷикистон  маълумоти  муфассал  дод. Ҳамкории Тоҷикистону  Туркия   баъди  сафари  расмии  Президенти  ин  мамлакат Абдулло  Гул  ба  Тоҷикистон моҳи  майи  соли  2009  ба  бештар  вусъат  ёфтани  муносибатҳои  ҳар  ду  мамлакат  кӯмаки  калон  расонд. Моҳҳои  август  ва  декабри  ҳамон  сол  намояндагони  баъзе  ширкатҳои  Туркия  ба  Тоҷикистон  омада,  бо  шароити  ҳамкорӣ шинос  гардиданд. Айни  ҳол  баъзе  ширкатҳои  Туркия   бо  Тоҷикистон  барои тармиму  таҷдиди   нерӯгоҳҳои  барқи обии  Қайроққум,  Варзоб  ва  сохтмони  нерӯгоҳҳои  хурди  барқӣ  паймон  кардаанд. Ширкати  дигари  Туркия  қарор  додааст, ки   дар  Тоҷикистон  барои  истеҳсоли  қубурҳо  барои сохтмони  нерӯгоҳҳои  барқӣ  корхонаи  муштарак  бунёд  намояд. Шӯҳрат  Султонов  дар  хотима  ширкатҳои  Туркияро даъват намуд, ки ба  иқтисодиёти  Тоҷикистон  бештар  сармоя  гузоранд. Ин  ба  вусъат  ёфтани  ҳамкории  иқтисодии  ҳар  ду  ҷониб  мусоидат  хоҳад  кард,  гуфт  сафири  Тоҷикистон.