СОДИРОТИ ЛУБИЁГӢ 6 МАРОТИБА АФЗУДААСТ

 Суғд. 2 феврал.(АМИТ «Ховар», Самад Юсуфӣ).- Соли 2009 аз вилояти Суғд ба хориҷи кишвар 100 ҳазор тонна маҳсулоти кишоварзӣ содир карда шудааст, ки нисбат ба соли 2008  30 ҳазор тонна зиёд аст. Соли  гузашта аз вилояти Суғд зиёда аз 1000 нафар соҳибкорон ба содироти маҳсулоти кишоварзӣ машғул шуданд. Содироти меваи тару тоза, сабзавот, полезиҳо хусусан ба Федератсияи  Русия ва Қазоқистон зиёд гардидаст. Соли сипаригашта содироти меваи хушк зиёда аз 80 ҳазор тонна ва пиёз 60 ҳазор тоннаро ташкил дод. Содироти лимую хурмо, анор, мағзи чормагзи заминӣ давра ба давра зиёд шуда истодааст. Ё худ талабот ба маҳсулоти лубиёгӣ дар Афғонистону Эрон зиёд шуда ва соли 2009 аз вилояти Суғд ба ин давлатҳо содироти лубиё ба 23 ҳазор тонна расидааст, ки нисбат ба соли 2008 қариб 6 маротиба зиёд аст. Яке аз омилҳои зиёд шудани содироти маҳсулоти кишоварзӣ аз вилояти Суғд ба хориҷи кишвар афзоиши истеҳсоли маҳсулоти деҳқонон аст.