«БАРҚИ ТОҶИК» МИЗОҶИ «ҚӮРҒОНТЕППАТРАНСФОРМАТОР» НЕСТ, ЧАРО?

Душанбе, 9 март. (АМИТ «Ховар», Лаззат Диловарзод).- Бино ба гуфти директори   «Қӯрғонтеппатрансформатор» Зикрулло Бекмадов, ҷумҳурӣ дар давоми сол ба 500 – 600 трансформатори истеҳсол кардаи корхонаи мазкур эҳтиёҷ дорад. Ширкати «Барқи тоҷик», ки фармоишгари асосии корхонаи «Қӯрғонтеппатрансформатор» маҳсуб меёбад, аз чӣ бошад, ки дар давоми соли 2009 аз трансформаторҳои истеҳсолкардаи ин корхона ягонтоашро харидорӣ накардааст. Ба гуфти директор дар замони шӯравӣ корхона то 7 ҳазор трансформатор истеҳсол менамуд. Маҳсулоти истеҳсолшудаи он нафақат   Ҷӯмҳурии Тоҷикистонро,  балки тамоми ҷумҳуриҳои Осиёи Марказиро бо маҳсулоти хушсифати худ таъмин менамуд. Алҳол роҳбарияти корхона боварӣ дорад, ки  маҳсулоти истеҳсолкардаи  он нафақат дар дохил, балки дар   хориҷи кишвар низ харидори зиёд пайдо хоҳад кард. Бо пайваст шудани хатти нави барқи Тоҷикистон – Қундуз – Кобул — и Ҷумҳурии Исломии Афғонистон корхонаи «Қӯрғонтеппатрансформатор» бозори нави худро пайдо хоҳад кард.