ИБРОҲИМ ҲАСАНОВ ВАФОТ КАРД

Душанбе,  3 март. (АМИТ «Ховар»,  Пайрав  Назаров). —  Варзишгари нахустини  тоҷик, ки   дар  бозиҳои олимпӣ  иштирок  дошт,  қаҳрамони нахустини  Спартакиадаи  халқҳои  ИҶШС,  устоди  хизматнишондодаи  варзиши  ИҶШС,  қаҳрамони  дувоздаҳкаратаи  варзиши   ИҶШС, нахустин  тренери  хизматнишондодаи  ИҶШС  Иброҳим  Ҳасанов  дар  сини  73 — солагӣ  вафот  кард. Ӯ  солҳои  охир   ба  дастаи  мунтахаби  қаиқронони  Ҷумҳурии  Исломии  Эрон  машқ  медод. Иброҳим  Ҳасанов  соли  1937  дар  Душанбе  таваллуд  шудааст.  Ӯ   варзишгари  соҳаи  қаиқронӣ,  устоди  хизматнишондодаи  варзиши  ИҶШС,  тренери хизматнишондодаи  ИҶШС,  барандаи  ҷоизаи комсомоли ленинии  Тоҷикистон,  номзади  илми тибб,  профессор,  вакили  Шӯрои олии  ҶШС Тоҷикистон мебошад. И.Ҳасанов Донишкадаи  давлатии  омӯзгории   шаҳри  Душанбе  ва Донишкадаи   давлатии  тиббии  ба  номи  Абӯалӣ  ибни  Синоро  хатм  кардааст. Бародарон Юрий  Лобанов —  қаҳрамон  ва барандаи  ҷоизаи  биринҷии  бозиҳои  олимпӣ,  қаҳрамони  ҳашткаратаи  варзиши  ҷаҳон  ва Михаил  Лобанов – қаҳрамони  дукаратаи  варзиши  ҷаҳон  ва  дигарон  шогирдони   Иброҳим  Ҳасанов  мебошанд. Ӯ  солҳои тӯлонӣ  ректори  Донишкадаи   тарбияи  ҷисмонии  Тоҷикистон,  раиси  Кумитаи давлатии  варзиш  ва тарбияи  ҷисмонии  Тоҷикистон  ва нахустин раиси  Кумитаи олимпии  Тоҷикистон буд. И.Ҳасанов   ҳамчун   мураббии  барҷастаи   соҳаи  варзиши  Тоҷикистон  дар  асри  20  эътироф  гардидааст. Мавсуф  бо  ордени  «Нишони  ифтихор»,  ифтихорномаҳои Шӯрои олии  ҶШС Тоҷикистон  ва  медалҳои  сершумор  мукофотонида шудааст. Ҷасади  И.Ҳасанов аз  Эрон  ба  ватан  оварда  мешавад. Маросими  ҷаноза 4  март дар  шаҳри  Душанбе баргузор  мегардад. И.Ҳасанов дар  қабристони  Лучоб  дафн  карда  хоҳад  шуд.