ИМЗОИ СОЗИШНОМАИ ГРАНТӢ

Душанбе, 12 март.(АМИТ «Ховар», Марзия Саидова).-12 март дар шаҳри Душанбе Созишномаи грантии Ҳукумати Ҷопон ва Ҳукумати Тоҷикистон ба маблағи умумии 282 ҳазору 172 доллари америкоӣ ба имзо расид. Ин ҳуҷҷатро Сарпарасти Сафорати Ҷопон дар Ҷумҳурии Тоҷикистон Йошихиро Накаяма, раиси ноҳияи Рашт Маҳмадҷон Давлатов, муовини аввали раиси ноҳияи Роштқалъа Фазлиддини Иброҳим, муовини раиси ноҳияи Панҷ Хайриниссо Кенҷаева дар хузури вазири маорифи ҷумҳурӣ Абдуҷаббор Раҳмонов  имзо карданд. Созишномаи  мазкур дар доираи кӯмакҳои бебозгашти лоиҳаҳои амнияти башарӣ барои бахши аъзами аҳолӣ амалӣ карда мешавад. Тибқи ин Созишнома барои амалӣ гардидани «Лоиҳа оид ба муҷҷаҳаз гардондани мактабҳои ноҳияи Рашт бо таҷҳизоти мактабӣ», Ҳукумати Ҷопон 95 ҳазору 809 доллари америкоӣ, барои татбиқи «Лоиҳа роҷеъ ба барқарорсозии мактаби миёнаи № 27 –и ноҳияи Роштқалъа» бошад 90 ҳазору 939 доллари америкоӣ ва барои амалӣ сохтани «Лоиҳаи азнавсозии мактаби №24-и ноҳияи Панҷ, ки аз сабаби обхезӣ вайрон шудааст» 95 ҳазору 425 доллари ИМА ҷудо намудааст. Татбиқи лоиҳаҳои мазкур ба рушди соҳаи маориф дар ҷумҳурӣ мусоидат менамояд.