МАРҲАБО БА ИППОДОРОМ ДӮСТДОРОНИ ҲУНАРИ АСПТОЗӢ

Душанбе, 26 март.(АМИТ «Ховар», Марзия Саидова).- Бо иқдоми Мақомоти иҷроияи ҳокимияти давлатии шаҳри Душанбе дар ҳамкорӣ бо Вазорати кишоварзии ҷумҳурӣ 28 март соати 10-пагоҳӣ дар Корхонаи воҳиди давлатии «Ипподором» мусобиқаи варзишӣ -аспдавонӣ баргузор мегардад. Аз Хадамоти матбуотии Раиси шаҳр ба АМИТ «Ховар» иттилоъ доданд, ки дар мусобиқаи аспдавонӣ беҳтарин варзишгарон ва асптозон аз минтақаҳои гуногуни ҷумҳурӣ иштирок намуда, бо чусту чолокӣ ва ҳунару истеъдоди аспдавонӣ хотири тамошобинонро шод мегардонанд. Ҳадаф аз ташкили чунин мусобиқаи варзишӣ тарғиби тарзи ҳаёти солим, ҳунари аспдавонӣ ва ҷалби ҷавонон ба варзиш буда, он чун анъана дар рӯзҳои таҷлили иди Наврӯз дар гӯшаю канори гуногуни ҷумҳурӣ гузаронида мешавад. Ба беҳтарин астптозон ва варзишгарон аз ҷониби Вазорати кишоварзии мамлакат тӯҳфаҳо, аз қабили саҳмияҳои НБО «Роғун» тақдим карда мешавад.